Абай Құнанбайұлының 180 жылдық мерейтойы аясында Семей елінде Қарауыл ауылында «Жеті қазына» республикалық фестивалі өтіп, М.Әуезов атындағы ОҚУ-нің абайтанушы ғалымы Әзімхан Исабек жүлделі үшінші орынды иеленіп қайтты. 

Жүлдеге жорға табысталды. Фестивальдің «Ілім-білім» бағыты бойынша қатысушылар Абайдың өлеңдері мен қарасөздерін жатқа айтуы тиіс. Жас ғалым Әзімхан Исабек додада сүрінбей талаптардың үдесінен шығып, топтан суырылып шықты. 

– Жоба өте ауқымды өтті. «Жеті қазына» бұл – «Ер жігіт», «Сұлу әйел», «Ілім-білім», «Қыран бүркіт», «Жүйрік ат», «Құмай тазы» және «Берен мылтық». Қазақстан бойынша қатысушылардың қарасы өте көп болды. Соның ішінде Шымкент қаласынан «Ілім-білім» бағыты бойынша қатысуға маған ұсыныс түсті. Маған сенім артқан Шымкент қаласы әкімінің орынбасары Сарсен Құранбек ағамызға, Шымкент қаласы мәдениет және тілдерді дамыту және архивтер басқармасының басшысының орынбасары Мөлдір Оңдасыноваға және дайындық жұмыстарына қолдау көрсеткен театр режиссері, Қазақстанның еңбек сіңірген қайраткер қоғам қайраткері Бекболат Құрманқожаев ағама үлкен алғысымды білдіремін.  Бұл – халқымыздың өмір салтын тереңнен таныстыратын, ұлттық мұраларымызды насихаттайтын бірегей жоба.. Фестиваль елдің рухын көтеріп, еңсесін тіктеуге сеп болды, - дейді Ә.Исабек. 

Атап өтсек, жас ғалым ақын, ағартушы, қазақ әдеби тілінің негізін қалаушы, философ, сазгер Абайдың 100-ден аса өлеңін жатқа біледі. Осыған дейін республикалық, қалалық Абай оқулары байқауында талай рет жеңімпаз атанған. Абай мұраларын зерттеп жүрген ғалымның жақында хакім Абайдың 180 жылдығына орай көлемді ғылыми-зерттеу-еңбегі жарыққа шықты. «АБАЙ. Мүрсейіт қолжазбаларына сүйеніп жасалған транскрипция» атты бұл кітап ұлт руханиятына, қазақ әдебиетінің дамуына үлкен үлес қосты.  Оның айтуынша, Абай шығармашылығы оның туған күні мерейтойларында ғана ұлықталмайды екен.

– Хакім Абайдың мұраларын ұлықтауда Шымкент қаласында ауқымды іс-шаралар дәстүрлі түрде өтіп тұрады. Оған мысал ретіндегі жыл сайынғы «Абай оқулары» байқауын атап өтуге болады. Сонымен жуырда ғана имамдардың бастамасымен «Хәкім Абай және Ихсан тағылымы»  атты рухани танымдық семинары ұйымдастырылды.  Онда Абай мұралары насихатталды, жастарды ғылым-біліммен қатар, «Абай тағылымдарын негізге ала отырып қалай тәрбиелейміз» деген  сауалдарға жауап іздеді. Абай – қазақ руханияты мен имандылығының алтын көпірі. Оның мұрасын діни тұрғыдан дәріптеу – ұлттық сана мен тәрбиенің өзегін жаңғырту, - деді өз сөзінде Ә.Исабек.