Шымкентте көрнекті мемлекет және қоғам қайраткері Дінмұхамед Ахметұлы Қонаевты еске алу күні аталып өтті.

Мұндай тағылымды шаралар өскелең ұрпаққа ел тарихындағы ұлы тұлғаларды танытып, отансүйгіштік рухты қалыптастыруға негіз болады.

Қонаев даңғылы бойындағы қайраткердің ескерткішінің алдына жиналған қала әкімдігі, зиялы қауым өкілдері, ардагерлер, қала тұрғындары гүл шоқтарын қойды.  Іс-шара барысында Д.Қонаевтың көзін көрген азаматтар Қонаевтың өмір жолы, саяси қызметі, қайраткердің елге сіңірген еңбегі мен қазақ халқына жасаған тарихи қызметі жайлы естеліктер айтты. 

Жиында сөз алған Шымкент қалалық ардагерлер кеңесінің төрағасы Кенжехан Төлебаев «Дінмұхамед Ахметұлы – халқына шын берілген, әділдігімен, парасаттылығымен, ел басқарудағы ерекше көрегендігімен есте қалған тарихи тұлға. Ол кісінің ел дамуына қосқан үлесі ұшан-теңіз. Қонаевтың дара жолы – кейінгі ұрпаққа үлгі, өнеге. Бүгінгі еске алу жиыны – біз үшін тек құрмет қана емес, ұлы азаматтың рухына тағзым, оның еңбегін бағалау деп білеміз», деді. Қоғам қайраткері Орынбай Рахманбердиев ұлы тұлғаның қазақ елінің болашағы үшін жасалған еңбектерін айтып, басшылық қызмет жылдарындағы игі істерін жастарға өнеге етіп айтып берді. Ардагер Бекет Тұрғараев Дінмұхамед Ахметұлы – ұлтымыздың көрнекті мемлекет қайраткері, парасатты тұлға, әділдігімен, қарапайымдылығымен, терең білім-пайымымен ел есінде мәңгі қалған бірегей адам. Ол кісінің еліміздің дамуына қосқан үлесі өлшеусіз. Қонаевтың өмірі мен қызметі – бүгінгі жас ұрпақ үшін үлкен өнеге. Бүгінгі еске алу – оның жарқын бейнесіне тағзым ету, тарихи мұрасын ұлықтау. Мұндай тұлғалар уақыт өткен сайын бағасы арта түсетін асыл қазына», деді өз сөзінде. 

Шымкент халқы жыл сайын ұлт тұлғасын еске алып, рухына тағзым етуді ұмытқан емес. Атап өтейік,  2005 жылы Шымкент қаласында Дінмұхамед Ахметұлы Қонаевтың құрметіне мұражай ашылды. Мұражайда 400-ге жуық экспонат бар, оның ішінде Қонаевтың жеке заттары, фотосуреттері, портреттері, құжаттары, қолжазбалары және бейнематериалдар ұсынылған. Сонымен қатар қайраткердің есімімен аталған басты көшелердің бірі — Қонаев даңғылы бар. Бұл көше қаладағы маңызды нысандардың бірі болып табылады және Қонаевтың есімін ұлықтауға арналған. Ал 2024 жылдың қаңтарында Шымкент қаласының Нұрсәт шағынауданында 3500 орынға арналған заманауи жекеменшік мектеп ашылды. Бұл білім ордасы көрнекті мемлекет және қоғам қайраткері Дінмұхамед Қонаевтың есімімен аталады.