Шымкент қаласындағы Әдет-ғұрып және салт-дәстүр орталығы ұйымдастырған «Құрақ құрау – өнердің сарқылмас қайнар көзі» атты шеберлік сағатында әлемдік рекорд орнатылды. 

Шеберлік сағатқа он саусағынан өнері тамған 660 құрақшы қатысып, үлкен көлемдегі ұлттық көздің жауын алатын композиция жасалды. 660 көрпешеден құралған құрақ елдің назарын аударып, ұлттық өнерге деген сүйіспеншілікті арттырды. 

Іс-шараның басты мақсаты –  ұлттық қолөнерді насихаттап, жастардың ұлттық өнерге деген қызығушылығын арттыру, көркемдік талғамын дамыту және ата-баба мұрасын жаңғырту, - дейді орталық мамандары. Бұл жобаның бастамашысы, ұлттық өнер жанашыры Нұргүл Абайханның айтуынша, композиция «Аламан құрақ» түрінен жасалған. 

– «Аламан құрақ» жобасы – халқымыздың ғасырлар бойы қалыптасқан құрақ құрау өнерін жаңа сипатта жаңғыртып, ұлттық мұраны әлемге танытуды мақсат еткен ерекше бастама. Бұл – тек өнерді дәріптеу ғана емес, мәдени кодымызды сақтап, келешекке жеткізудің жарқын үлгісі.

Жоба аясында құрақ құрау шеберлері бір алаңда бас қосып, өзара тәжірибе алмасып, өнерлерін паш етуге мүмкіндік алды. Осылайша, сан ғасырлық шеберлікті біріктіріп, бір арнаға тоғыстыру – бұрыннан ойда жүрген арман болатын. Бүгінде сол арман орындалып, «Аламан құрақ» халықаралық деңгейге жетті. Бұл жетістік – ұлттық өнерге деген жанашырлықтың, өз тамырымызға деген құрметтің айқын көрінісі. Жобаның табысты жүзеге асуы – құрақ өнерінің тек тұрмыстық қолданбалы бұйым емес, мәдени мұра ретінде кең танылуына жол ашты. Мұндай игі бастамалар арқылы біз ұлттық өнерімізді жаңғыртып қана қоймай, оны әлемдік мәдени кеңістікке енгізуге үлес қосып келеміз, – дейді жоба жетекшісі.

Құрақ құрау – қазақ халқының ғасырлардан бері жалғасып келе жатқан қолданбалы өнерінің бір түрі. Ол тек сәндік мақсатта емес, терең мағына мен тәрбиелік мәні бар рухани мұра ретінде де бағаланады. Әрбір құрақтың өзіндік символдық мәні, түс пен пішін үйлесімі халқымыздың дүниетанымы мен өмірлік философиясын көрсетеді.

Құрақ – үнемділікті, шеберлікті, эстетикалық талғамды ұштастыратын өнер. Алыстан көз тартатын алуан түсті құрақтарда ұлттық нақыш, отбасылық жылулық, татулық пен бірлікке деген сенім көрініс табады. Ол ұрпақтан-ұрпаққа аманат ретінде беріліп, ұлттық кодымызды сақтауда үлкен рөл атқарады. Қазіргі таңда құрақ өнері қайта жаңғырып, заманауи үлгіде дамып келеді. Киім, аксессуар, интерьер дизайнында ұлттық нақыштағы құрақтар кеңінен қолданылып жүр. Бұл – халқымыздың рухани байлығын ұлықтаудың, ұлттық мұрамызды болашақпен сабақтастырудың бір жолы.

Әдет-ғұрып және салт-дәстүр орталығы ұйымдастырған шеберлік сағаты арқылы жас ұрпақ ата-бабадан қалған асыл мұра – құрақ құраудың қыр-сырын меңгеріп, оны бағалауға, құрметтеуге үйренеді.