Шымкент қаласындағы Әл-Фараби атындағы ғылыми-әмбебап кітапханасы қазіргі уақытта балаларға ұлттық құндылықтарды насихаттауға бағытталған бірнеше жобаны іске асырып жатыр.

Бұл жобалар аясында оқушыларға арналған танымдық шаралар, әдеби кештер, шеберлік сабақтары, көрмелер ұйымдастырылып, салт-дәстүр, әдет-ғұрып, ұлттық мұраларымыз жайлы кітаптар мен дереккөздер кеңінен насихатталуда. Жобаның басты мақсаты — өскелең ұрпақтың бойына ұлттық рух пен құндылықтарды сіңіру, ата-баба аманатына адал болуға тәрбиелеу.

Сондай бастаманың бірі – «Ақерке» балалар залының ұйымдастырумен кітапханада өтетін  «Әже, ертегі оқып берші!» жобасы. Онда әжелер балаларға қазақ ертегілерінен үзінділер айтып, қазақ халық ертегілерін насихаттай отырып, балалардың қиял-шығармашылық қабілеттерін шыңдап, балдырғандармен бірге ертегілер еліне саяхат жасайды.

Жобаның кезекті іс-шарасында Раушан әже балаларға қазақ халық ертегілерін оқып берді.  «Ертегі – тек қиял ғана емес, балаларым. Ол – өмірдің шындығы. Біз сендерге ертегі айтып, тек көңіл көтеріп қоймаймыз, әр ертегінің астарында бір үлкен сабақ, өнеге жатыр. Батырлықты, адалдықты, мейірімділік пен жаманнан жиренуді ертегіден үйренесің. Кішкентайыңнан тыңдасаң, жүрегіңе ізгілік ұялайды. Мен де кішкентайымда әжемнен тыңдағам, енді өзіңе айтып отырмын. Ертегі – ұрпақтан ұрпаққа жалғасқан тәрбие мектебі, қарағым» деген тілегін де жолдады ақ жаулықты әжеміз. 

Әл-Фараби атындағы ғылыми-әмбебап кітапхана қызметкерлері ұлттық құндылықтарды насихаттауда, оқырманды кітап оқуға ынталандыруда, әдебиетсүйер қауымды белгілі ақын-жазушылар, қоғам қайраткерлерімен жүздестіріп, ой-пікір алмастыруда үлкен  жұмыстар атқарып келеді.   

Кітапханадағы отбасылық институтты нығайтуға және жастар арасында кітап оқу мәдениетін қалыптастыруға бағытталған «Оқитын отбасы – ұлт болашағы», «Кітап.Таным.Тұлға» жобалары аясында түрлі мазмұнды кездесулер мен кештер ұйымдастырылуда. Бұл шаралар кітап оқып, жетістікке жеткен тұлғаларды дәріптеуге және жастарды рухани кемелденуге жетелеуге бағытталған. Кітапты кеңінен қолжетімді ету мен оқу мәдениетін насихаттаудың заманауи тәсілдері – кітапхананың басты міндеттерінің бірі. Осы бағытта «Бір ел – бір кітап», «Бір қала – бір кітап», «Әже, ертегі оқып берші», «Ұлдарға ұлағат» сынды жобалар жүзеге асырылып, жастарды кітапқа баулуда тиімді құралға айналып отыр. Сондай-ақ жыл сайын өтетін жалпы республикалық «KitapTime» фестивалі, «FARABI QUEST» квест-ойыны, «Сүйікті кітаппен селфи», «Сүйікті қаламмен селфи» секілді жаңа форматтағы іс-шаралар да жастардың қызығушылығын арттырып келеді. Бұл бастамалар ұлт болашағы – жастардың рухани әрі зияткерлік дамуына зор үлес қосуда.