Шымкент қаласындағы Әл-Фараби атындағы ғылыми-әмбебап кітапханасы балаларға ұлттық мұраларымызды ұлықтауда үлкен жұмыстар атқарып келеді.

Кітапхананың  «Ақерке» балалар залында  мектеп оқушыларына арналған «Шебер қолдар» үйірмесінде балалар шығармашылық қабілеттерін дамытып, қолөнердің қыр-сырымен танысады. Әсіресе, жаз мезгілінде балалардың уақытын тиімді өткізуде үйірмеде түрлі іс-шаралар, көрмелер ұйымдастырылды.

Кішкентай шеберлер түрлі материалдарды пайдалана отырып, ұлттық қолөнер бұйымдарын жасайды. Кітапхана қызметкерлері «Өткізіліп жатқан әрбір іс-шара балалардың қиялын дамытып, ұқыптылыққа, шыдамдылыққа тәрбиелейді. Сонымен қатар, олар бір-бірімен идея бөлісіп, топпен жұмыс жасаудың маңыздылығын ұғынды. «Шебер қолдар» үйірмесі — балалардың шығармашылығын ашатын, олардың қол еңбегіне деген қызығушылығын арттыратын пайдалы әрі қызықты орта»,-  дейді. 

Балаларды ұлттық қолөнер бұйымдарын жасауға үйрету — ұлттық мұраны сақтау мен болашақ ұрпақты тәрбиелеудің маңызды жолдарының бірі. Бұл үрдіс арқылы балалар өз халқының тарихы мен мәдениетіне терең бойлайды,  эстетикалық талғамы қалыптасады, еңбекке баулынады және шыдамдылық, ұқыптылық қасиеттерін меңгереді. 

– Балалардың жазғы уақытта бос уақыты көп болады. Кітапханада «Шебер қолдар» үйірмесі бар екенін мекеменің саябақта балалар арасында кітаптар көрмесін өткізіп жатқанда байқап қалдым.  Қызымды үйірмеге жазып, қазір түрлі бұйымдар жасап үйренді.  Ұлттық қолөнер бұйымдарын жасап, кесте тігуді меңгеру ойлау қабілетін жақсартады. Өзім ұстаз болып еңбек еткендіктен,  мұндай тәрбие арқылы бала туған халқын құрметтеуге, салт-дәстүрге сыйластықпен қарауға үйренеді. Ұлттық құндылықтармен сусындап өскен ұрпақ елін сүйетін, рухани бай, болашаққа берік азамат болып өседі, - деп ойлаймын,-  дейді қала тұрғыны Гүлнұр Сұлейменова.

Жалпы бала кішкентай кезінен дәстүрлі қолөнер түрлерін жасауға үйрену  — балаларға ұлттық болмысты танытудың тиімді құралы. Мұндай сабақтар мектепте, қосымша үйірмелерде немесе арнайы мәдени орталықтарда ұйымдастырылғаны құп-құп іс деуге келеді.