Қазақ әдебиеті мен тарихы, ұлт мұралары, ұлт тұлғаларының еңбектерін терең зерттеу арқылы, ұлт руханиятын дамытуға шымкенттік ғалымдар үлкен үлес қосып келеді. 

Қаламыздағы М.Әуезов атындағы Оңтүстік Қазақстан университетінің  «Мұхтартану» ғылыми-зерттеу орталығының ғалымдары бүгінде қазақ әдебиеттану ғылымын ілгерілету жолында аянбай қызмет етуде. Бұл орталықты көзі тірісінде Мемлекеттік сыйлықтың иегері, 2019 жылы ҚР Президенті Қасым-Жомарт Кемелұлы Тоқаевтың қолынан І дәрежелі «Барыс» орденін алған айтулы ғалым ағамыз профессор Мекемтас Мырзахметұлы бес жылдан аса басқарды. 

– Орталықта абайтану, мұхтартану салаларында соңғы жылдары елді елең еткізген бірқатар  ғылыми жаңалықтарды атап өтуге болады. Мекемтас Мырзахметұлы «Абайдың «Толық адам» ілімі» атты кітабы жарық көрген болатын, ғалымның бұл көпжылғы ізденісі дәл осы «Мұхтартану» орталығында ғылыми талдаудан өткен еді. Сондай-ақ,  Мекемтас ағамыздың «Абайтану» атты 10 томдық еңбегі де оқырманға жол тартты. Бұл 10 томдық –  М.Мырзахметұлының абайтануға арнаған елу жылдық өмірінің жемісі. Бұл жаңалықтар абайтану ғылымындағы ауыз толтырып айтатын сүбелі жетістіктердің бірі әрі бірегейі, - деп атап өтті орталық басшысы Ақжол Қалшабек.М.Әуезов – ұлы Абайдың жарқын бейнесін өзінің «Абай жолы» роман-эпопеясы арқылы өшпестей етіп уақыт жадына жазып кетті. Сонымен бірге Мұхтар Омарханұлы Абайтану ғылымының іргетасын тозбастай етіп қалады.  Соның арқасында қазіргі таңда «абайтану», «мұхтартану» атты ғылым салалары бүгінгі қазақ әдебиеті мен әдебиеттанудың шамшырағы іспеттес зор рухани-мәдени локомотивке айналған. Бұл бағыттағы шымкенттік ғалымдардың ізденісі тоқтаған емес.

«Мұхтартану» орталығы ғалымдарының жүргізген ғылыми ізденісінің нәтижесінде Абай Құнанбайұлы ұрпақтарының есімі, қайтыс болған мерзімі мен жерленген орындары көрсетілген ерекше мемориалды тақтаның табылды. Бұған қоса тағы бір үлкен ғылыми жаңалық – дәл осы «Мұхтартану» орталығының қызметкері Ақжол Қалшабек шәкірті Әзімхан Исабекпен бірлесіп қазақ әдебиеттану  тарихында тұңғыш рет Абай Құнанбайұлының күні бүгінге дейін «Отыз сегізінші қара сөзі» аталып келе жатқан «Китаб тасдиқ» шығармасының транскрипциясын жасап шықты.

А.Құнанбайұлының 180 жылдығы мерейтойы қарсаңында Әуезов ғалымдары «АБАЙ. Мүрсейіт қолжазбаларына сүйеніп жасалған транскрипция» атты жаңа ғылыми еңбекті жарыққа шығарды. Кітаптың тұсаукесері Семей елінде Ұлы Абайдың 180 жылдық мерейтойында тұсауы кесілді.