Қазақтың ұлттық киімдері – тек сән үлгісі емес, ол ұлттың болмысы, рухани байлығы мен терең тарихының көрінісі. 

Соңғы жылдары заманауи сән индустриясында ұлттық киімді жаңаша көзқараспен ұсынып, әлемге танытып жүрген отандық дизайнерлер қатары көбейіп келеді. Солардың қатарында шымкенттік жас дизайнерлер, М.Әуезов атындағы ОҚУ-нің оқытушылары қазақтың ұлттық киімдерін АҚШ-та өткен халықаралық конференцияның сән көрсетілімінде ұсынып, халықаралық марапатқа ие болды. 

АҚШ-тың Бостон қаласындағы Harvard University кампусында Global Business Symposium халықаралық конференциясы өтті. Оған университеттің «Киім дизайны» категориясы бойынша  «Бейнелеу өнері және дизайн» кафедрасының оқытушылары Ғазиза Мұратбаева мен Сымбат Нұридин үш кезеңнен сәтті өтіп, арнайы шақыртумен қатысқан. Нәтижесінде олар ең үздік халықаралық марапатқа ие болды.

– Үш кезеңнен өткен сайыс болды. Соңғы сән көрсетілімінде ұлттық киімдерімізден топтама ұсындық. Ұлттық шапандарымыз, зергерлік бас киімдер көпшіліктің қызығушылығын тудырды. Бұдан бөлек, ұлттық тағамдардан құрт ұсынылды. Олардың таңданысы ерекше болды, - деп атап өтті Ғазиза Мұратбаева.

– Бұл жобада киімдер дәстүр мен заманауи стильдің үйлесімін керемет түрде көрсете білдік. Киімдердің дизайнында қолданылған кестелер, ою-өрнектер және табиғи маталар – барлығы қазақ мәдениетінің тереңдігін, байлығын және сұлулығын көрсетуге бағытталған. Керемет көрініс қазақтың ұлттық киімі шетелдік көрермендерге ерекше әсер қалдырды. Сондай-ақ қолөнерінің терең мағынасы мен кестелеу өнерінің ерекшеліктері, ұлттық нақыштағы киімдердің тартымдылығы мен мәні туралы көрермендер үлкен қызығушылықпен тыңдады, - деген әсерімен бөлісті Сымбат Нұридин.

Шымкент қаласында ұлттық киімдерді ұлықтауда елімізге танымал дизайнерлер өз топтамаларын көрсетіп, сән фествальдерін ұйымдастырса, жас дизайнерлер, жоғары оқу орындарында өнер бағытында білім алушылар өз топтамаларын халықаралық байқауларға үсынып келеді. Бұл бағытта көрме, байқаулар қаламыздағы Көрме орталығында жиі ұйымдастырылады.

– Расында бұрын ұлттық шапандар, кестелі, ою-өрнек салынған бүрмелі көйлектер, тақия «мерекенің сәні «деп саналатын алайда қазіргі жас дизайнерлер ұсынып жатқан топтмалар, жастар арасында кеңінен таралуынан сұраныс артып жатыр. Қазір күнделікті киюге арналған киімдердегі ою-өрнек, кесте, ұлттық нақыштар мен патриоттық бағыттағы ұрандар, ұлы тұлғаларымыздың фотолары бейнеленген заманауи стильдегі киімдерге қызығушылық өте жоғары, - дейді Ғ.Мұратбаева. Шымкентте ұлттық киімдерді дәріптеуге арналған іс-шаралар сан ғасырлық мұраның қадірін сезінуге, ұлттық стильдің жаңа қырларын ашуда – үлкен ортағы айналуда.