Мемлекет басшысы Қасым-Жомарт Тоқаев халықты әлеуметтік қорғауға бағытталған мемлекеттік бағдарламаның сапалы жүзеге асырылуы бойынша нақты тапсырмалар жүктеді. Нәтижесінде жұмыссыздық деңгейін 4,5 пайыздан асырмау қажеттігін ескертті.

Президент тапсырмасына сәйкес Шымкентте жұмыссыздықты төмендету мақсатында азаматтарды еңбекпен қамту шаралары қарқынды жүргізілуде. 

- Ел Президенті Қасым-Жомарт Тоқаев Қазақстан халқына Жолдауында жұмыссыз жастардың мәселесін тілге тиек еткен болатын. Яғни, жастарға жан-жақты қолдау көрсету – мемлекетіміздің басты міндеті деп атап өтті. Мемлекет басшысы «Еңбекпен қамтитын түрлі шаралар арқылы келесі жылы 100 мың жасқа жұмыс беруіміз керек. Жастардың кәсіпкерлік бастамаларына қолдау көрсетіле бермек. Оларға жеңілдетілген тәртіппен жылдық өсімі 2,5 пайыз болатын шағын несие беріледі. Бұл шаралар қоғамның барынша үйлесімді әрі әділетті болуына ықпал етеді». Осыған орай, Шымкент қаласында жастарға кәсіпкерлікті дамыту бойынша түрлі кеңестер беріліп, қолдау көрсетіліп келеді, - дейді қала әкімі.

Қазір еңбек нарығында техникалық және кәсіптік сала мамандарына атап айтқанда, дәнекерлеуші, электрик,  құрылыс жұмыстарының шебері мен компьютер және аппаратық құралдарының операторы, көкөніс өсіруші мен мерчендайзарлерге сұраныс өте көп. 

Нарықтағы сұраныс ескеріліп, «Кәсіпкерлікті дамытудың 2021-2025 жылдарға арналған ұлттық жобасы»  аясында қысқа мерзімді кәсіптік оқыту шаралары ұйымдастырылуда. Бұл тек жұмыссыздарды азайтып қана қоймай, отандық өндірісті қолдауға да мүмкіндік беруде. Биыл қалада қысқа мерзімді кәсіптік оқыту қыркүйек айында басталады.

Жалпы, былтырғы жылы кәсіптік оқыту бағдарламасы бойынша 2134 адам қамтылған болатын. Жұмыс берушілерден түскен өтініштер негізінде биыл 1500 азаматты оқу ұйымдарында түрлі мамандықтар бойынша оқыту жоспарлануда. Қатысушы 3 ай кәсіптік оқыту мерзімінде  20948 теңге шәкіртақы және бір реттік материалды көмек алады. Кейін жұмыс беруші жұмыссыз азаматты әлеуметтік келісімшарт негізінде 10 жұмыс күні ішінде жұмыс орнына кемінде 6 ай мерзімге жұмысқа қабылдайды. Сондай-ақ жұмыс беруші компаниялардың өтінішімен 760 адамды жұмыс орындарында кәсіптік оқыту жоспарланып отыр.  Оқу аяқталған соң бітіруші кемінде 12 ай мерзімге тұрақты жұмыс орнына орналасады. Қазір 34 компаниядан 40-тан астам мамандыққа өтінім түскен.  Қысқа мерзімді кәсіптік оқыту онлайн платформа арқылы да жүзеге асырылады.  https://skills.enbek.kz/ сайты арқылы бүгінде 2 жарым мыңнан астам азамат онлайн білім алған.