Мақтаарал ауданының полицейлері жұмысының сейфінен ақша ұрлаған күзетшіні ұстады. Бұл туралы Түркістан облысы Полиция департаментінің баспасөз қызметіне сілтеме жасап RGMEDIA.KZ ақпарат агенттігі хабарлады.

Мақтаарал аудандық Полиция бөліміне осы өңірдегі фирмалардың бірінде жұмыс жасайтын жергілікті тұрғын арызданады. Оның айтуынша, өзінің қызметтік бөлмесінде темір сейфке сақтап жүрген жеті миллион теңгеге жуық жеке ақшасын белгісіз тұлғалар ұрлап кеткен. Ойда-жоқта жиған-тергенінен айырылып қалған жәбірленуші ер адам «осы ұрлықты ашып берсеңіздер» деп полицейлердің көмегіне жүгінген. Аталған жайт СДТТБТ-не енгізіліп, ҚР ҚК-нің 188-бабы «Ұрлық» бойынша тіркелді.

Келіп түскен хабарлама бойынша Мақтаарал АПБ-нің жедел тергеу тобы оқиға орнына жетіп, арнайы топ құрылып сұрастыру жұмыстарын жүргізді. Ұрлыққа күдікті тұлғаны анықтауға бағытталған барлық жұмыстар атқарылды. Аптаға жуық жедел-іздестіру іс-шаралары барысында, жинақталған ақпарат көздері арқылы полиция қызметкерлері күдіктінің жеке басын анықтады. Ірі көлемді ақшаны жымқырған сол мекеменің күзетшісі болып шықты. 

Тергеу барысында анықталғандай, сейфтің есігі ашық қалғанын байқап қалған күзетшінің ойы бұзылып, жеңіл жолмен ақша табу мақсатында ішіндегі ақшаларын алып кетіп, үйіне апарып жасырған. 90 мың теңгеге жуық ақшасын өзінің қажеттілгіне жаратып үлгерген. Тәртіп сақшылары күдікті азаматтың үйінен ұрланған ақшаны айғақты зат ретінде тәркілеп алып, заңды иесіне қайтарды. Қазіргі таңда тергеп-тексеру амалдары жүргізілуде. Күдіктінің бас шарасы «қолхатта».

Түркістан облысы полицейлері азаматтарға бағалы заттарыңызға, ақшаларыңызға сақ болыңыздар деп ескертеді. Мүмкіндігінше ірі көлемдегі ақшаларыңызды мықтылап бекітілген сейфте сақтауға кеңес береді.