Еңбекші ауданында алимент бойынша берешекті өтеу және балалардың құқықтары мен заңды мүдделерін қорғау бағытында жүйелі жұмыстар жүргізілуде. Бұл бағыттағы шаралар «Заң және тәртіп» қағидаты аясында борышкерлердің міндеттемесін орындауына жағдай жасауға және алимент төлемдерінің тұрақты түсуін қамтамасыз етуге бағытталған.

Алимент бойынша қарыздың жиналуы ең алдымен баланың тұрмыс жағдайына әсер етеді. Сондықтан берешекті өтеу тек қаржылық міндеттемені орындау мәселесі емес, баланың заңмен қорғалған құқығын қамтамасыз етуге қатысты маңызды міндет.

Осыған байланысты жұмыссыз борышкерлердің тұрақты табыс көзіне ие болуына ықпал ету мақсатында олардың бос жұмыс орындары жәрмеңкесіне қатысуы ұйымдастырылды. Шара барысында жұмыс берушілер мен алимент бойынша берешегі бар азаматтар арасында тікелей байланыс орнатылып, бос жұмыс орындары туралы ақпарат берілді.

Борышкерлерге өздерінің білімі, кәсіби дағдылары мен еңбек тәжірибесіне сәйкес келетін жұмыс түрлерін қарастыруға мүмкіндік жасалды. Жәрмеңке нәтижесінде бірқатар азамат жұмысқа орналасуға жолдама алып, тұрақты табыс табу мүмкіндігіне ие болды.

Тұрақты жұмысқа орналасу борышкердің алимент бойынша міндеттемесін орындауына мүмкіндік береді. Яғни мұндай шараның нәтижесі бір азаматтың жұмыс табуымен ғана шектелмейді. Оның артында алименттің уақытылы төленуі, баланың қажеттіліктерін қамтамасыз ету және заңды мүддесінің қорғалуы тұр.

«Заң және тәртіп» қағидаты азаматтардың өз міндеттерін жауапкершілікпен орындауын талап етеді. Алимент төлеу де – заңда белгіленген міндет. Оны орындамау баланың мүддесіне әсер етіп қана қоймай, борышкер үшін заңда көзделген жауапкершілікке әкелуі мүмкін.

Сондықтан алимент бойынша берешекті өндіріп алу кезінде тек мәжбүрлеу шараларына емес, борышкердің қарызын өтеуіне нақты мүмкіндік беретін тетіктерге де мән беріледі. Жұмыспен қамтуға жәрдемдесу – осы бағыттағы шаралардың бірі.

Баланың құқығы мен заңды мүддесін қорғау – ортақ міндет. Ал ата-ананың өз міндетін орындауы баланың қажеттіліктерін қамтамасыз етудің маңызды шарты. Еңбекші ауданындағы бұл жұмыстар да заң талаптарын орындау мен балалардың құқықтарын қорғауға бағытталған.