Шымкент қаласы Полиция департаментінің Отбасылық-тұрмыстық зорлық-зомбылыққа қарсы күрес бөлімінің қызметкерлері тұрғындар арасында құқықтық сауаттылықты арттыруға бағытталған профилактикалық акция өткізді. Іс-шараның негізгі мақсаты – отбасылық-тұрмыстық зорлық-зомбылықтың алдын алу, азаматтардың құқықтық мәдениетін қалыптастыру және қоғамда зорлық-зомбылыққа мүлдем төзбеушілік қағидатын орнықтыру.

Акция барысында полиция қызметкерлері тұрғындарға тұрмыстық зорлық-зомбылықтың алдын алу шараларын жан-жақты түсіндіріп, мұндай құқық бұзушылықтар үшін заңнамада көзделген жауапкершілік туралы кеңінен ақпарат берді. Сонымен қатар жәбірленушілерге көрсетілетін құқықтық, психологиялық және әлеуметтік көмек түрлері, сондай-ақ қолданыстағы қорғау тетіктері жөнінде түсіндірме жұмыстары жүргізілді.

Полицейлер отбасындағы зорлық-зомбылықтың тек бір отбасының мәселесі емес, бүкіл қоғамның қауіпсіздігіне әсер ететін әлеуметтік проблема екенін атап өтті. Сондықтан мұндай жағдайларға куә болған немесе зорлық-зомбылыққа ұшыраған азаматтардың үнсіз қалмай, құқық қорғау органдарына дер кезінде жүгінуі аса маңызды. Уақытылы көрсетілген көмек ауыр зардаптардың алдын алып, адамның өмірі мен денсаулығын сақтап қалуға мүмкіндік береді.

Акция аясында тұрғындарға арнайы ақпараттық жадынамалар таратылып, тұрмыстық зорлық-зомбылықтың алғашқы белгілерін тану, құқықтық қорғану жолдары және қажетті жағдайда қайда жүгіну керектігі түсіндірілді. Сонымен қатар азаматтар кез келген зорлық-зомбылық фактісіне бейжай қарамай, мұндай жағдайлар орын алса, дереу полицияға хабарлауға шақырылды.

Шымкент қаласы Полиция департаменті әрбір азаматтың өмірі, қауіпсіздігі мен заңды құқықтарын қорғау – полиция қызметінің басты міндеттерінің бірі екенін атап өтеді. Бұл бағыттағы профилактикалық жұмыстар алдағы уақытта да тұрақты түрде жалғасады.

Мемлекет басшысы айқындаған «Заң мен тәртіп» қағидаты аясында отбасылық-тұрмыстық зорлық-зомбылықтың алдын алу, азаматтардың құқықтарын қорғау және қоғамда заңға құрмет мәдениетін қалыптастыру – құқық қорғау органдары жұмысының негізгі басымдықтарының бірі.