«Заң мен тәртіп» қағидатын іске асыру аясында Шымкент қаласының Абай ауданында пробация қызметінің есебінде тұрған азаматтардың қоғамға қайта бейімделуіне қолдау көрсетуге арналған кездесу өтті. Іс-шара Абай ауданы прокуратурасының бастамасымен ұйымдастырылып, оған пробация қызметінің мамандары, жергілікті атқарушы органдардың және жауапты мемлекеттік мекемелердің өкілдері қатысты.

Кездесудің негізгі мақсаты – пробация есебіндегі сотталғандардың қайта қылмыс жасау тәуекелін төмендету, олардың құқықтық сауаттылығын арттыру, әлеуметтік мәселелерін шешуге жәрдемдесу және қоғамға толыққанды бейімделуіне жағдай жасау. Құқық қорғау органдарының өкілдері азаматтарды тек бақылауға алумен шектелмей, олардың заңды өмір салтын қалыптастыруға бағытталған кешенді қолдау шараларын жүзеге асырудың маңыздылығын атап өтті.

Іс-шара барысында сотталғандардың ұсыныстары мен өтініштері тыңдалып, құқықтық сипаттағы сұрақтарына жан-жақты түсіндірме берілді. Сонымен қатар еңбекпен қамту, кәсіптік оқыту, әлеуметтік көмек алу, мемлекеттік бағдарламаларға қатысу және құжаттарды рәсімдеу мәселелері бойынша нақты кеңестер ұсынылды. Жауапты мекемелер әрбір азаматтың жеке жағдайына қарай қажетті қолдау көрсету тетіктерін қарастырды.

Тұрақты жұмыспен қамту, әлеуметтік қолдау және құқықтық кеңес беру – қайта қылмыс жасаудың алдын алудағы ең тиімді құралдардың бірі. Азаматтың қоғамнан шет қалмай, еңбекке араласуы мен әлеуметтік байланыстарының нығаюы оның заңға қайшы әрекеттерден аулақ болуына оң әсер етеді.

Кездесу барысында қатысушылар заң талаптарын сақтау, қоғамдық тәртіпті бұзбау және жүктелген міндеттерді адал орындау әрбір пробация есебіндегі азаматтың жауапкершілігі екені жөнінде ескертілді. Сондай-ақ мемлекеттік органдар тарапынан көрсетілетін қолдау шараларын тиімді пайдалану қажеттігі айтылды.

Осындай профилактикалық кездесулер пробация қызметінің тиімділігін арттырып қана қоймай, сотталғандардың қоғамға қайта бейімделуіне, олардың құқықтық мәдениетін қалыптастыруға және құқық бұзушылықтардың алдын алуға ықпал етеді. «Заң мен тәртіп» қағидаты аясындағы бұл жұмыстар алдағы уақытта да жүйелі түрде жалғасын тауып, қауіпсіз қоғам қалыптастыруға қызмет ете береді.