Қазақстан Республикасының Президенті Қасым-Жомарт Тоқаев "Халық үніне құлақ асатын мемлекет" тұжырымдамасын нақты іске асыруды мемлекеттік басқарудың басты қағидаттарының бірі ретінде айқындаған болатын. Бұл ұстаным — қоғамның әрбір мүшесінің пікірін есту, азаматтардың мұң-мұқтажын назардан тыс қалдырмау, жергілікті биліктің халықпен кері байланысын күшейту дегенді білдіреді. Сонымен қатар, ел Президенті азаматтардың өтініштері мен талап-тілектері заң аясында қаралып, барлық шешімдер тек құқықтық нормалар негізінде қабылдануы қажет екенін бірнеше рет баса айтқан.

Осы бағыттағы жұмыстар Түркістан облысында да жүйелі түрде жүзеге асырылып келеді. Облыс әкімдігі азаматтардың ұсыныс-пікірлеріне ашықтық танытып, тұрғындармен тікелей сұхбат орнату үшін түрлі кездесулер мен қабылдаулар өткізуді дәстүрге айналдырған. Соның бірі ретінде Түркістан облысы әкімінің орынбасары Ертай Алтаевтың қатысуымен өткен кезекті жеке қабылдауды атауға болады.

Азаматтарды қабылдау барысында облыс әкімінің орынбасары өңір тұрғындарының өтініштерін тыңдап, көтерілген әрбір мәселені назарға алды. Ертай Кенжебекұлы қабылдауға келген әрбір азаматтың талабына түсіністікпен қарап, айтылған ұсыныстар мен өтініштер заң шеңберінде қаралатынын нақты атап өтті. Оның айтуынша, облыс әкімдігі тұрғындардың мұң-мұқтажына немқұрайлы қарамайды, алайда барлық шешімдер қолданыстағы заңнамаға сәйкес қабылдануы тиіс.

Қабылдау барысында көтерілген мәселелердің дені мәдениет пен спорт саласына қатысты болды. Түркістан қаласының бір тұрғыны ономастика саласына байланысты ұсынысын ортаға салса, Ордабасы ауданынан келген азамат қоғамдық бірлестіктің қызметіне қатысты пікірін білдірді. Тағы бір тұрғын өңірдегі спортты дамытуға, жасөспірімдерге арналған секциялардың жұмысын жандандыруға қолдау сұрады. Бұл ұсыныстар тек жеке мүддені ғана емес, қоғамдық маңызы бар бастамаларды да қамтыды.

Ертай Алтаев әрбір сұраққа нақты жауап беріп, көтерілген мәселелердің орындылығы мен құқықтық негізіне сәйкес жауапты сала мамандарына нақты тапсырмалар жүктеді. Жеке қабылдауда айтылған жайттар бойынша тиісті бөлімдерге бағыт беріліп, оларды егжей-тегжейлі зерделеу қажеттігі айтылды. Бұл ретте тұрғындар көтерген мәселелердің тексеріліп, тиісті шешімдердің заңдылық тұрғысынан қабылдануы басты назарда болмақ.

Азаматтардың жеке қабылдауға келуі — олардың билікке деген сенімінің көрінісі. Бұл үдеріс жергілікті басқару органдары мен халық арасындағы ашық диалогты нығайтып, әкімшілік шешімдердің сапасын арттыруға ықпал етеді. Түркістан облысы әкімдігі үшін тұрғындардың үнін есту — жай міндет емес, бұл — заманауи басқару үлгісінің өзегі. Осылайша, әрбір азаматтың мәселесін жеке назарға алу арқылы билік халыққа жақындай түседі.