Халыққа арнаған былтырғы Жолдауында президент Қасым-Жомарт Тоқаев COVID-19 індетіне қарсы күресті күшейту қажеттігін және алдын алу шаралары кезінде дәрігерлердің, педагогтардың, құқық қорғау органдары қызметкерлері еңбегінің ерен екендігін атап өткен болатын. 

Бүгінде коронавирусқа қарсы екпені бірінші кезекте халықпен тығыз жұмыс істейтін жоғарыда аталған мамандық иелері қабылдауда. Түркістан облысында 20 936 адам екпе қабылдаса, оның  13 887 - медицина қызметкері, 5407 – педагог, 600-ге жуығы құқық қорғау органдары мен 500-ге жуығы әртүрлі топтағы азаматтар.  Түркістан облысы әкімінің баспасөз қызметінің хабарлауынша, эпидемиологиялық  ахуалды ескере отырып, сәуір айында екпе салдыруға ниет білдіргендердің саны артқан. Қазір екпе қабылдағандар дәрігерлердің бақылауында. 

Облыста екінші  компонентпен 10 мыңға жуық  вакцина алды. Еске сала өтсек, екпе салу түрлі санат бойынша кезегімен жүргізілуде. Инфекцияға қарсы вакцинациялау жұмыстары қаладағы 65 емдеу мекемесінде жүргізілуде. Бүгінгі таңда вакцина салдыру – коронавирус ауруының таралуын болдырмаудың бірден- бір жолы болып отыр. Вакцина тегін және ерікті түрде салынады.

Соңғы тәулікте  Түркістан облысында 13 адамда COVID-19 індеті анықталды. Тәуліктік өсім 0,28 % құрайды. Жалпы облыста пандемия белең алағалы 600 мыңға жуық ПТР- сынамалары алынған. Соңғы тәулікте  зертханаларда 3 мыңдай адам тексерілген. Жұқпалы аурулар ауруханасында барлығы 610 орын бар. Жалпы, пандемия басталғалы инфекциясы расталған 4598 жағдай тіркелді. Олардың 2933-да ауру симптомсыз өткен болатын. Айта кетейік, Түркістан обылысы жасыл аймақта.