2025 жылдың шілде–қыркүйек айларында қазақстандықтар барлық тұтынушылық шығындарының 57,2%-ын азық-түлікке жұмсаған. Мұндай деректі Finprom.kz сарапшылары келтірді, деп хабарлайды Оinet.kz.

Сарапшылардың атап өтуінше, дамыған елдерде бұл көрсеткіш 10–15%-дан аспайды. Ал 57,2% – 2021 жылдан бергі ең жоғары деңгей. Тек пандемияның алғашқы жылында ғана  азық-түлікке жұмсалатын шығын бұдан жоғары болған (58%). Ол кезде локдаундар мен кәсіпорындардың тоқтауы салдарынан халық табысы азайып, табыстың басым бөлігі ас-ауқатқа кеткен.

Соңғы жылдардағы динамика да алаңдатарлық:

2024 жылы – 54,5%;

2023 жылы – 55,7%;

2022 жылы – 55,2%.

III тоқсанда кей өңірлерде азық-түлік шығындарының үлесі одан да жоғары болды:

Жетісу облысы – 65,8%;

Түркістан облысы – 65,3%;

Алматы облысы – 62,2%.

Сарапшылар бұл аймақтардың аграрлық бағытта болуы және экономикалық даму деңгейінің төмендігімен байланыстырады.

Ал азық-түлікке ең аз қаражат жұмсаған өңірлер:

Қарағанды облысы – 50,6%;

Солтүстік Қазақстан облысы – 51,4%;

Ақмола облысы – 51,8%.

Қалалық тұрғындардың шығыны әсіресе мына тауарларға айтарлықтай артқан:

ет және ет өнімдері – 22,3%;

жеміс-жидек – 18,6%;

көкөніс – 16,8%;

май және тоң май өнімдері – 16,4%.

Сонымен қатар азық-түлікке жатпайтын тауарларға жұмсалатын шығын 240,9 мың теңгеден 220,2 мың теңгеге дейін азайған. Қазақстандықтар көбіне:

автокөлік тауарлары мен жанар-жағармайдан (–30,2%);

телефондардан (–19,1%);

түрлі техникадан (–7,2%);

жөндеу жұмыстарынан (–19,3%) үнемдеген.

Сарапшылардың пікірінше, шығын құрылымының мұндай өзгерісі халық табысының едәуір бөлігінің күнделікті тұтынуға кетіп жатқанын көрсетеді.