Жастар кәсіпкерлігін дамытуға арналған несие шарттары белгілі болды. Микрокредит 5 жылға дейін беріледі. Ал мал шаруашылығы саласындағы жобаларға 7 жылға дейін.

Қарызды 5 млн. теңгеге дейін 2,5 пайызбен алуға болады. Несие алатын уақытта үміткердің жеке кәсіпкер ретінде тіркелу мерзімі бес жылдан аспауы тиіс. Жастарға арналған жеңілдетілген кредит «Аграрлық несие корпорациясы» арқылы беріледі.

Қазір Ашық үкімет порталында құжат жобасы екінші желтоқсанға дейін қоғамдық талқылауға шығарылған. Шағын несие беруді Жұмыспен қамту мәселелері жөніндегі жергілікті атқарушы орган іске асырады.

Finprom.kz-тің есебінше, елімізде бір жыл ішінде жұмыс істеп тұрған жеке кәсіпкерлік субъектілері 8,3 пайызға көбейіп, 1,2 миллионға жетіпті. Ондағы жас кәсіпкер­лер­дің үлесі 14,5 пайыздан 18,2 па­йызға артқан.

Жеке кәсіпкерлігі бар жас­тардың 109,1 мыңы – ерлер, 102,8 мыңы – әйелдер. Ерлердің саны бір жыл ішінде 24,7 пайызға ұлғайса, әйелдер саны бірден бір жарым есе өсті. Осылайша, жұ­мыс істеп тұрған жас кәсіпкер­лер­­дің жалпы санындағы әйел­дер­дің үлесін 43,7 пайыздан 48,5 пайызға дейін арттырды.

Жас кәсіпкерлер негізінен көтерме және бөлшек саудада, сондай-ақ автожөндеу саласында шоғырланған. Аталған бағыттарда 73,6 мың жеке кәсіп­кер жұмыс істейді. Ондағы әйел­дердің үлесі – 49,9 пайыз немесе 36,7 мың жеке кә­сіп­керлік. Одан кейінгі орын­да ауыл, орман және балық шаруа­шы­лықтары тұр. Мұнда 15,4 мың же­ке кәсіпкерлік бар. Оның үштен бірі әйелдерге тиесілі. Жастар көп шоғыр­лан­ған салалар­дың үштігін өңдеу өнер­кәсібі құрап отыр. Мұн­дағы жас кәсіпкерлердің саны 12,4 мыңға жуықтайды. Оның 61,7 пайызы – әйелдер.

Шымкент қаласы тұрғындарының 20 проценті жастар. Яғни үшінші мегополисте 14-29 жас аралығында 245 мың азамат бар. Соңғы жылдары үшінші мегаполисте де мемлекеттік бағдарламалардың арқасында кәсіппен айналысатын жастардың қатары көбейіп келеді.  Жоғарыда аталған жоба да шымкенттік жастардың ісіне береке берері анық.