Соңғы кездері халық арасында мемлекеттік-жекеменшік әріптестік деген ұғым кеңінен қолданылуда.Бүгінде Қазақстанда аталған жүйе негізінде 153 жоба әзірленіп жатыр. Дені білім саласына арналған. Мемлекеттік-жекеменшік әріптестік аясында Шымкентте де  жаңа мектептер салынуда. Бұның екі жаққа да пайдасы орасан зор: білім ұяларына қатысты орын жетіспеушілігі мәселесі шешіледі әрі кәсіпкерлердің жұмысы алға басады.

Осы ретте Шымкент қаласында былтыр физика-математика бағытын тереңдетіп білім беретін «Intellect» лицейі  ашылған.  Асар шағынауданында заманауи үлгіде бой көтерген мектеп 5,6,7,8,9 сыныптарға арналған. Жалпы пәндер бойынша қосымша сабақтар жүргізіліп, шахмат, домбыра және тігін үйірмелері де жұмыс істейді. Еліміздің білім беру стандартына сәйкес сабақ беретін мектептің директоры Ерлан Құдайбергеновтің сөзінше, лицейде физика-математика пәні тереңдетіліп оқытылады.   Заманауи үлгіде бой көтерген білім ошағы екі оқу ғимараты, акт залы, медициналық пункт және асханамен қамтылған. Ал 23 сыныптық оқу бөлмесі бар.

Білім мекемесі 600 орынға арналған. Қазір мұнда жан басына қаржыландыру әдісімен 300-ге жуық оқушы ақысыз  білім алып отыр. Аталған оқу ордасы шәкіртке әлемдік деңгейде сапалы білім мен ұлттық деңгейде саналы тәрбие беру арқылы егеменді еліміздің азаматын жан-жақты дамыған зияткер тұлға етіп қалыптастыруды көздейді.

«Дәл осы мөлтек ауданнан ашылып жатқаны бізді қуантып отыр. Өйткені мұндағы №89, №90 білім ордалары үш ауысымды мектеп қатарына жатпағанымен, бала саны шамадан әлдеқайда артық. Яғни, жан басына қаржыландыру бойынша жұмыс істейтін жекеменшік мектептердің бой көтеруі осы мәселенің шешілуіне көп септігін тигізеді»,- дейді қалалық білім басқармасының басшысы Жанат Тәжиева.

Соңғы жылдары  үшінші мегаполисте білім саласына инвесторлар тартылып, жан басына қаржыландыру жүйесі бойынша жұмыс істейтін жекеменшік мектептер көптеп салынуда.