Шағын және орта бизнесті дамыту үшін қолайлы жағдай жасау мен халықты жұмыспен қамту мақсатында Шымкент қаласындағы «Іскер қала» бағдарламасы бойынша алғашқы өнеркәсіптік парк Silkway Alliance ашылған болатын. Өнеркәсіптік парк- бұл жалға беруші компаниялардың өндірістік қызметін жүзеге асыруға арналған инфрақұрылым, коммуникациялар, электрмен жабдықтау, өндірістік және әкімшілік үй-жайлары бар аудандарды пайдалану үшін жеке аумақ. Өнеркәсіптік парктер мен оның резиденттері үшін мемлекеттік қолдау жүзеге асырылған. Өнеркәсіптік парктердің резиденттеріне жалдау ақысының бір бөлігі өтеледі; бірінші жылы – жалдау құнының 75 пайыз, екінші жылы – 50 пайыз, үшінші жылы-25 пайыз. Резиденттерге ең төменгі пайыздық мөлшерлеме бойынша 2 пайызға дейін субсидиялау арқылы микрокредит беру қарастырылған.

Осы іс-шаралар жоспарының құралын пайдалану үшін ісін жаңа бастаған кәсіпкерге Shymkent Invest «Фронт офисінде» тіркелу қажет. 

Қазіргі таңда өнеркәсіптік паркте 7 кәсіпкер яғни резиденттер кәсібін дамытуда.  (Жаңа жұмыс орындарымен 69 адамды қамтып отыр). Соның бірі қазақи нақышта көшпенділер жиһазын өндіретін Quraq Group. Ежелгі дәстүрімізді ескере отырып, “Құрақ корпусты” алмастыратын және әртүрлі мөлшердегі кереуетке, дивандарға және креслоларға оңай ауысатын “Quraq” трансформаторлық жиһазын өндіреді.

Яғни, шағын бөлменің кеңістігін тарылтпайтын жинақы бір дүниеден бірнеше пайдалы бұйым шығатын дүние. Мысалға: шкафтан диванға немесе төсекке айналады. Диваннан екі қабатты (ярусты) төсек болады.

Сондай-ақ, манежден үстел, төсек, кресло, диванға айналатын бөбекке арналған жиһаздар да кездеседі.  Бұл сізге тұрғын үйдің әр сантиметрін ұтымды пайдалануға мүмкіндік береді. Quraq Group өнімдерінің өзгелерден басты ерекшелігі көздің жауын алар ұлттық оюлар бедерленген  нақышында. Кәсіпорынның жиһаздарына бүгінде сұраныс арта түскен.