Былтыр ел Тәуелсіздігінің 30 жылдығына орай Шымкент қаласындағы «Тассай» индустриялық аймағының жанынан «Silkway Alliance» өндірістік паркі іске қосылған болатын. Шағын және орта кәсіпкерлікті дамытуға бағытталған өндірістік парк «Іскер қала» бағдарламасы шеңберінде жүзеге асырылған пилоттық жоба.

Мұндағы барлық инженерлік инфрақұрылыммен қамтылған дайын өндірістік алаңдар кәсіпкерлерге ұсынылатын болады. Парктің жалпы алаңы 4,4 гектарды құрайды. Оның 3 мыңға жуық текше метрі өндірістік алаңдар үшін, ал, 1 мыңнан астам текше метрі кеңсе алаңы үшін жалға беріледі. 

Үшінші мегаполисте  шағын және орта бизнесті дамытуға бағытталған бұдан өзге мемлекеттік бағдарламалар сәтті жүзеге асып келеді. 

Мемлекет басшысы «Қарапайым заттар экономикасы» және «Бизнестің жол картасы» бағдарламаларының мерзімін 1 жылға ұзарту жөнінде шешім қабылдаған еді. Бұл кәсіпкерлер үшін үлкен мүмкіндік екені даусыз. Қалада бүгінде аталған мемлекеттік бағдарламалар шеңберінде 2 мыңнан астам жобаға қолдау көрсетілді. Сонымен қатар, «Мен кәсіпкер боламын» жобасымен әйелдер мен жастар кәсіпкерлігін дамыту үшін 10 миллион теңгеге дейін 1 пайыздық 6 шағын несиелер беру қарастырылған. Бұдан бөлек, кәсіпкерлерге ыңғайлы жағдай жасау үшін «Бизнеске арналған үкімет – Shymkent Invest» кәсіпкерлерге қызмет көрсетудің бірыңғай орталығы жұмыс істейді. Ал, осы жылы кәсіпкерлердің жеңілдетілген несиеге қол жеткізуі үшін «Shymkent – Atameken» микроқаржы ұйымы құрылды. Бұл жұмыстардың барлығы кәсіпкерлерге қолдау көрсету мақсатында жасалып отыр.

Қала басшысын өндірістік парктің жұмысымен таныстырған Шымкент қалалық кәсіпкерлік және индустриялды-инновациялық даму басқармасының басшысы Береке Дүйсебековтің айтуынша  жобаның бірінші кезеңінде 15 резидент орналасқан,  69 жұмыс орнын құрумен 8 жоба орналастырылған. Жобаның екінші кезеңінің құрылысы ағымдағы жылы аяқталған.