«Рахат-Шымкент» ЖШС мегаполис­тегі ірі кәсіпорындардың бірі болып са­­налады. Шымкентте  компа­ния­­ның өнімдері ең алғаш 2001 жы­лы шығарылды. Содан бері өндіріс орны­ның аясы кеңейіп, бүгінде мұнда 7 түрлі тәтті өнімдер 52 атаумен ішкі-сыртқы нарыққа жөнелтілуде. Жылына 24 мың тонна өнім өндіретін кондитерлік фабрика өнімдерінің көлемі соңғы жылдармен салыстырғанда 20 пайызға өскен.

Осыдан екі жыл бұрын  фабрика Шым­­кентте қантты күлше шығаратын жаңа өн­дірістік желіні іске қосты. Өндірістік желіні іске қосу үшін 3,2 млрд теңге инвестиция тар­тыл­ған. Мемлекеттік «Өндіріс» бағдар­ла­масы арқылы компанияға жылдық мөл­шерлемесі 6 пайыздық жеңілдікпен 2,6 миллиард теңге несие берілген. Қала әкім­дігінің қолдауымен жұмыс бас­та­ған фабрика өндіріске қажетті қондыр­ғы­ларды Италиядан алдырыпты.

«Ита­лиялық жаңа қондырғы сары­май­­­дан жасалатын күлшемен бірге оның қамыры майда құм секілді болып келетін түрін шығаруға мүмкіндік береді. Жаңа күлшенің ортасындағы тәтті жұмсағы жемістерден жасалған тосап немесе шоколадты крем болуы мүм­кін. Ресейде бұл өнім кең таралған. Ал Қазақстанда тұңғыш рет біздің фабрикада шығарылмақ. Жаңа қондырғы Polin деп аталады. Ол әлем бойынша кон­дитерлік өнімдер шығаратын ең үздік өндірістік желінің қатарына кіреді. Оның бірден-бір артықшылығы, табиғи газбен де жұмыс істей береді және өнімділігі өте жоғары. Мә­се­лен, печенье өндірісінде сағатына 2 мың тоннаға дейін өнім шығара алады»-, деді серіктестік директоры Жұлдыз Рахипбекова.

Шымкенттік өнім­дер бүгінде ішкі нарықтан бөлек көр­ші­лес Ресейге, Украинаға, Орталық Азия мем­лекеттеріне, тіпті Германияға экс­­порт­талуда. Фабриканың қала эко­но­­ми­­касына қосар үлесі зор болып тұр. Бірін­шіден, қосымша инвестиция тартылды. Екіншіден, жаңадан қан­шама тұрақты жұмыс орны ашылды. Үшін­ші­ден, кә­сіп­орын өнімдерін шетелге жөнелту ар­қы­лы табысы ұлғаяды, сонымен бірге мем­лекеттік бюджетке тү­се­тін салықтың кіріс бөлігі де артады. Бұл өз кезегінде ел­дегі көптеген әлеуметтік мәселенің оң шешім табуына жұмсалатын болады. 

 «Рахат» АҚ басқарма төрағасының орын­­басары Пак Гюн Ельдің мәлім­де­­уін­ше, тәттілер өндіретін өзіміздің «Рахат» фабрикасы оңтүстіккорея­лық Lotte компаниясының құрамына кіре­тін ­9 ел­дегі кондитерлік кәсіпорындар ішінде өндіріс ауқымы мен табысы жағынан бірінші болып тұр екен.