Қазақстан Республикасы Президентінің Жолдауын іске асыру бойынша ақпараттық-насихаттық топтың мүшелері Шымкент қаласы Сайрам тұрғын алабындағы «Юнекс» ЖШС-нің жұмысшыларымен кездесті. Кездесуде Шымкент қаласы Қоғамдық кеңестің мүшесі, «Оңтүстік Қазақстан жылыжай жұмыскерлері қауымдастығының» төрағасы Мырзахмет Сынабаев Мемлекет басшысының биылғы Жолдауында айқын көрсетілген негізгі бағыттарды атап көрсетті. 

-Жолдау – мемлекеттілікті одан әрі нығайтуды, азаматтардың құқықтарын қорғауды жетілдіруді және халықтың әл-ауқатын арттыруды көздейтін маңызды құжат. Онда Қазақстанның жаңа экономикалық саясатының басым бағыттары айқындалған. Жаңа экономикалық саясаттың негізгі мәні – ұлттық байлықтың игілігін барлық азаматтар көре алатындай әділетті экономикалық жүйе құру. Сонымен қатар, жаңадан кәсіп бастаушылар мен кәсіпкерлерді қолдау, жұмыссыздық мәселесін шешуде оң бетбұрыстар жасалмақ. Қазіргі таңда жаңа өндіріс орындарын ашу, жұмысшыларға жағдай жасау, мамандар даярлауға көңіл бөлінуде. Нарықтық кезеңге сәйкес, шығарылған өнімдер де бәсекеге қабілетті болуы тиіс, -деді М.Сынабаев. 

Еліміздің болашағы жастар екендігі барлығымызға мәлім. Сондықтан, жастарға жан-жақты қолдау көрсету – мемлекетіміздің басты міндетінің бірі.

Бұл орайда, жастардың кәсіпкерлік бастамаларына қолдау көрсетіліп, оларға жеңілдетілген тәртіппен жылдық өсімі 2,5 пайыз болатын шағын несие берілетін болады.

Шағын және орта кәсіпкерлікті дамыту - экономикалық өрлеудің және әлеуметтік-саяси жаңғыртудың басты құралы болары сөзсіз. Осы салаға көңіл бөлу арқылы жұмыссыздар қатарын азайту сынды мәселелердің түйінін тарқатуға болады. Ал, еліміздегі шағын және орта кәсіпкерлікті орнықты дамыту үшін цифрлы технологиялар­­ды қолдану мүмкіндіктерін кеңінен пайдалану қажет дейді жиынға қатысушылар. 

Кездесуде мекеме жұмысшылары айтылған мәселелер бойынша сұрақ жауап алмасып, ой-пікірлерімен бөлісті. Қала аумағында мұндай ақпараттық-насихаттық топтың жиындары жалғасын табатын болады.