Шымкентте біраз уақыттан бері күрделі жөндеу жұмыстары жүріп жатқан  теміржол вокзалы жаңа кейіпке ие болды. Қала қонақтары мен туристерді қарсы алатын маңызды нысан заманауи келбетке жаңарды. Сонымен бірге нысанның жолаушыларға қызмет көрсету сапасы да әлдеқайда жақсармақ. 

Шымкент қаласы әкімдігі баспасөз қызметінің хабарлауынша, қала көркін арттырып, тұрғындар мен қонақтарға заманауи талапқа сай жайлы жағдай жасау мақсатында теміржол вокзалының ғимараты қайта жаңартылды. 10 жылға жоспарланған инвестиция қаражаты 1 жыл ішінде қарастырылып, былтыр 10 маусымда басталған жұмыстар 2024 жылдың 10 мамырында толық аяқталды. Сенімгерлік басқаруға нысанды беру арқылы қайта жаңғырту жұмыстары тиімді жүзеге асқанын атап өткен жөн. Мұнда тәулігіне 27 бағыт бойынша поездардың қызметі ұйымдастырылған.

1968 жылы салынған ескі вокзалдың жалпы ғимарат алаңы 1 770,2 шаршы метрді, жолаушыларды өткізу қабілеті тәулігіне 2 мың жолаушыны құраса, бүгінде қайта жаңғырту жұмыстарынан кейін теміржол вокзалының аумағы 2 249,33 шаршы метрге ұлғайып, өткізу қабілеті тәулігіне 6 мың адамға дейін артты. Сондай-ақ, жолаушыларды күту залының аумағы 898,3 шаршы метрден 1 982,3 шаршы метрге дейін артты.

Жобада ғимараттың екінші кіреберісі, жолаушыларға жайлы қызмет көрсететін заманауи талапқа сай 2 күту залы және екінші қабатта фудкорт қарастырылды. Вокзал ғимаратының қасбеті мегаполистің сәулеттік келбетіне сай жабдықталып, шыны витражды жүйелерден және металл кассеталардан жасалды.

Айта кетері, Шымкент әуежайының жаңа терминалы да бүгінде жеке инвесторлардың қаражатымен салынып жатыр. Терминалдың жолаушыларды өткізу әлеуеті әлдеқайжа жақсармақ. Жаңа терминал алдын ала жасалған жоспар бойынша биыл пайдалануға берілуі тиіс.