Ана туралы тақпақтар, өлең шумақтар топтамасы

Oinet.kz 02-08-2019 315035

blagoveschenskih-shkolnikov-priglashayut-prinyat-uchastie-v-konkurse-chtetsov-klassika-na-amure-2019-7c3a05153d3bffb8cc431076ba758915 (1).jpg

 Жан анама 

Нұрын шашқан күнімсің ғой жан анам,

Бар шуағын баласына арнаған.

Бір өзіңнен қуат алып өмірде

Сенің салған сара жолды жалғағам.

Айымсың ғой жарық қылар түнімді,

Жұлдызымсың сәнді еткен көгімді.

Бір Алладан саулығыңды тілеумен

Атқызамын әрбір ғажап күнімді.

Қымбат жансың, мен үшін ең асылсың!

Аллам сенен жамандықты қашырсын.

Әкемменен мәңгі шалқып бақытқа

Жастарыңды жүзден дағы асырсын!

Тілегімнің бастауы да бір өзің,

Мейiрiмге толы мынау нұр жүзің.

Сен жанымда болған кезде әр сәтім

Жаздай жайлы қысым менен сұр күзім.

Бақытымсың, жаным анам, жан анам,

Мен өзiңдi періштеге балағам.

Ауырмашы,  қартаймашы ешқашан.

Мақсатыңа жетші әр кез қалаған.

Өзіңсің ғой өмірімнің тірегі.

Аман жүрсең - маған сол гой керегі.

Бақытты бол, ауырма деп тілейді

Сәбиiңнiң жұдырықтай жүрегі!

...

Анашым 

Анашым!

Асыл анам, есіл анам,

Елжіреп есіркеймін, есіме алам.

Мен үшін сен суалтқан ақ сүтіңді

Ақтамасам, боп жүрмін несіне адам.

Алыс жолда жүрсем де арып-ашып,

Ағат ойлап түсірмей жаныңа шық,

Оқытып кешеу барған хаттарымды

Отырмысың үрпиіп, жаның ашып?

Өткізіп талай жылды, ай, аптаны,

Оқуын ұлың жақсы аяқтады.

Анашым, білем сені, қарсы емессің

Кеттім мен тың даланы оятқалы.


Анашым!

Қайда жүрсем сен - күш, арым,

Сүйемін дидарыңды, мен құшамын.

Қайда барсам, өзіндей қарсы алады

Кең байтақ Отанымның кең құшағы.


Анашым!

Жаратылдың бағыма шын

Білемін көңілсізсің, сағынасың.

Қайда жүрсем, қамқоршым Отаным бар.

Қапа болма мен үшін, неғыласың..

...

Ана жүрегі 


Өзгертпейді білемін

Шалшық және лай түсін.

Қайран ана жүрегі-

Даладай кең, Ай мүсін.

Қасіретің азайсын

Деп тіледім әз ана,

Өлеңдерім қол созсын,

Жеңілдетсін қайғысын.

Қатысым жоқ бейтарап

Қалай енді қала алам.

Жүректерін сауықтыр

Жерлік мұң мен жарадан.

Қиын нәрсе екен-ау

Жаратқан-ай, шарасыз,

Жылап тұрған Анаға

Еш дәрменсіз қараған.

...

Ананың сүюі 


Кім сендерді, балалар, сүйе-тұғын,

Куанышыңа қуанып, қайғыңа күйе-тұғын?

Түн ұйқысын төрт бөліп, кірпік қақпай,

Шешең байғұс дамылсыз жүре-тұғын.


Кім сендерді, балалар, тербететін,

Еркелетіп, ойнатып, сергітетін?

Жалқау болсаң, балалар, жаман болсаң,

Камқор анаң көз жасын көлдететін.


Кім сендерді сағынар шетке кетсең,

Ғылым іздеп, тез қайтпай, көпке кетсең?

Ұмытпа, ең кемінде жұлдыз сайын,

Хат жазып тұр, төбесі көкке жетсін.


Кім сағынар сендерді келгеніңше,

Кұлындарын көзімен көргенінше?

Сендер қайтып келгенде адам болып,

Еш арманым болмас дер өле-өлгенше.

...

Анама  


Кеудеңде мені тербеттің, жас шыбық енді көктеді.

Мінеки мен де ер жеттім, еңбегің бекер кетпеді.

Өмірде мынау ең жақын, аяулым сенсің, анашым!

Болмаса мейлі зор даңқың, мен үшін бірақ данасың.

Мейірім төккен нұр жүзің тұрғандай сезем жанымда.

“Адал бол, - деуші ең, - жұлдызым”, сақталды сөзің жадымда.

“Игі еңбек түбі осы-ау” дер көргендер жеміс ағашын.

Қартаймай, мәңгі жасай бер мәңгілік Күндей, анашым!

...

Анаға тілек 

Жеткізіп арманға жол күні бүгін,

Бақ құшты қызың менен бүгін ұлың.

Болғанмен бар болмысың қарапайым,

Байқалып тұрады, ана, ұлылығың!


Болмасын дедік те әр кез жүзі мұңды,

Еңбекті ұл, бейнетіңді қыз ұғынды.

Қылсын деп ұзағынан отырасың

Тәңiрден сұрап алған қызығыңды.


Жан-жағың толып бізбен бүтін бүгін,

Болғанда күнiң сәтті - ұтымды күн.

Сонда әр кез тәңіріңе тәуба десiп,

Тіліңнен үзілмейдi шүкірлігің.


Қызығын қызықтаумен немеренің,

Есте әр кез ақ бесікке бөлегенің.

Қуандың талай тойда шаңырақ пен

Жазылған шаттығына керегенің.


Оятып болашаққа сенімдерін,

Өзіңді қадiр тұтты келіндерің.

Бәйек боп жүресің-ау, ұрпақтардың

Болмаса дегендей-ақ көзінде мұң.


Болғандай тіршілікте бағың бала,

Ұл-қызың - өмірдегі тауың дара.

Солардың қызығына куә болып,

Аман жүр ортамызда, ауырма, ана!


Бекітіп шөбереңнің бұғанасын,

Той болсын әлі талай ұлан-асыр!

Қызықтап сол тойларда отырсыншы

Қазақтың қарапайым бір анасы!

...

Балам деп ойлар анасы

 

Маңдайдағы сызығым,

Өмірдегі қызығым,

Сезермісің кештерде

Ана жүрек қызуын?

 

Көктеп шетін көрпенің,

Шексіз ойды шертемін;

Адастырып жүр ме екен

Шындық жайлы ертегім?

 

Тұла бойы тұнығым,

Тұлымшақты құлыным,

Әділетке сенгіш ең

Қандай екен бүгінің?

 

Самғап арман құстарың

Жүрсің үйден тысқары.

Өмірден тек «ғайып» боп

Қалқып жүрме ұшқары.

 

Мұнай кетті жат елге,

«Вахта тірлік» әкеңде-

Сансыз күндер сендерсіз

Мұңаюмен өтем бе?

 

Рахат тауып еңбектен,

Қымбат, сәнді көйлекпен

Жеткен екем түсімде

Несиесіз зейнетке.

 

Көзайымым, қырмызым,

Көгімдегі жұлдызым.

О, жаратқан қолдай жүр

Жадау елдің ұл – қызын.

 



...

Ана-мерген    


Ана- мерген, нағыз батыр ол- ана,

Ана- сенім, пана болар балаға.

Бақыт деген анаңның алақаны

Жылытар әрдайым тоңғаныңда.


Тоғыз ай көтереді құрсағында,

Бақытыңды тілейді, саулықты да.

Ана деген сүйіспеншілікке толы жүрек

Ренжітумен сол жарықты өшіріп алма.


Анасы, бар жылуын төккен он ұл,

Бағаламады-ау, жылап қалды сорлы ана.

Құрсағынан туған жылан болғанымен

Кешіреді-ау ана жүрек сонда да.


Он ұл, отбасы болды, орынын тапты,

Бағып қаққан анасын ұмыта қапты.

Немересін иіскей алмай, біреуін де,

Ана байғұс қинала көзін жапты.


Ешкімнің шаруасы жоқ анасымен,

Дүние сыйлаған жəннаттың кілтіменен.

Ал сол ана қиналып əлі жүр ғой

Жайылған жапырағын көре алмай.


Күндер өтті, сағат, айлар, жылдар да

Сағынады, аңсайды перзентін.

Ана- жарық, өшпестей ешқашан да

Өмір бақи сақтап жүрер ұрпағын.


Ренжітпеңдер, көңіліне қаяу салмаңдар

Бар кезінде бағалалаңдар, сыйлаңдар!

Ананың ешқашан өшпес жарығы

Қара түнектен жалғыз амал шығарар!

...

Ана

Ана мені дүниеге әкелген

Ақ сүтіңнен нәр алып-ақ өсіп ем,

Балалықпен қанша тентек болсамда

Мейіріммен барлығында кешірген.


Айымсың ғой, күнімсің ғой жан анам,

Ақ тілекті біздер үшін арнаған.

Ренжітіп, мұңайтпаймын ешқашан.

Қадіріңді ұмытпаймын анашым.

...

Анам менің – аялаған ақ гүлім

Анам менің – бақытым мен шаттығым

“Анашым” – деп балаң жырын арнаған

Неге ғана естімеген тәтті үнін


Анам менің – өмірдегі тірегім

Анам менің – кеудемдегі жүрегім

Егер менің қасымда сен болмасаң

Бұл өмірде қалай ғана жүремін.


Ана дейміз бәріміз де аңқылдап

Ана дейді жас сәби де жарқылдап

Ана деген-бәйтерегі өмірдің.

Ана деген –алтын қазық, алтын бақ.

Ана деген- асыл жандар болаттай

Ана деген- мөлдір жандар бұлақтай.

О, адамдар қадірлей біл ананы

Жат қылыққа ақыл-ойды тонатпай.

...

Кезің жоқ мейірленіп тіл қатпаған, 

Сөзің жоқ өнегесін тыңдатпаған.

Осынау дөңгелеңген дүниеде,

Жан АНАМ, кім бар сендей қымбат маған?!

...

Аналарға.


Анасыздар, әр үйге панасыздар,

Бала десе от болып жанасыздар.

Сәтті басса ұрпағың,- мерей тасып,

Қыз күлкісін сусын қып қанасыздар.


Анасыздар — Ақ Еділ, Жайықсыздар -

Жүзе алмайды өтінде қайықсыздар.

Маздататын, жүректе от лаулататын,

Әр үйдің Күні десе,- лайықсыздар.


Өр десек те сіздерді, — лайықсыздар.

Төр десек те сіздерді, — лайықсыздар.

Ер десек те сіздерді, — лайықсыздар.

Зор десек те сіздерді, — лайықсыздар.


Анасыздар, кең байтақ даласыздар.

Жаны жайсаң жеңімпаз данасыздар.

Көлеңке жоқ көңлінде, қылауы жоқ,

Үлбіреген жауқазын баласыздар.


Сіздер — Күнсіз, аспанда жарқыраған,

Сіздер — өзен, тау суы сарқыраған,

Сіздер — ана, сіздер — жар, сіздер — қыздар,

Сіздер — жаңбыр, ақ нөсер сарқыраған


Біз сіздерсіз тіршілік ете алмаймыз.

Дегенге де сіздерсіз жете алмаймыз.

Айнала ұшып сіздерді көбелек боп,

Өртеніп қастарыңнан кете алмаймыз.

...

Арманыңды ақтармын ба жүрегімде тербесем,

Айға сіңлі, қарындассың қасиетті Жерге сен.

Мен өзінді теңдесі жоқ құдірет деп түсінем,

Сендік қуат мың есе артық Жердің тарту күшінен.

Сұлу әлем, әлем сұлу сен жаратқан адаммен,

Көк жолының қарсылығын қағып тастап барам мен.

Сендік қуат болар бәлкім, басын иді көк маған,

Әр кез сенен туғанымды есіме алсам, тоқтаман.

Ал ұмытсам, ұмыт болып қаларымды білемін,

Ұмыт қалмау үшін менің шарқ ұрады жүрегім.

Шат жүріп-ақ қас қаққанша боламын мен шерменде,

Жетім емес кей ананың жетімдігін көргенде,

Көз алдымда жас дөңгелеп булығам да ызадан,

Маған тіпті сөз келмейтін ұяттардан қызарам.

Бұл дүниеге онсыз-дағы кеткен жоқ па көп есең,

О, аналар, кей пасықты жаратасың неге сен!

Тасбауырлар дүниеге келсін де, тез кетсін де,

Әлде өзгелер ондайлардан жиіркенсін дейсің бе?

Ана керек, о, адамдар, ана керек адамға,

Анасыздар аң сияқты күн кешіп жүр ғаламда.

Пікірімді ұнатпаған таптық та дер дананы,

Даналықтың қажеті жоқ сыйлау үшін ананы.

...

Ана деген – ұлы есім!


О, Ана!

Неткен ұлы есім ең!

Тұрса да қажып тағдыры,

Бар шаттығым – бала деп,

Тәнін торлап таң нұры,

Мін бақпай ұрпақ өсірген.

Бар қатені кешірген,

Жасайды мәңгі аруана

Жалғасып тарих көшімен.

Асаудай асыл бейнесі,

Кетпейді адам есінен.

Баласын басса бауырына,

Нәр тамған ақ төсінен.

Бармақтай жатқан бақытты

Артық көрген өзінен.

Ол – сәби, сонда жылайды,

Ынтызар көмек сұрайды,

«Іңгә» деген сөзімен.


О, Ана!

Неткен ғажап есім ең!

Сен дегенде елжіреп,

Сен дегенде көсілем.

Сен дегенде шалқимын,

Болаттай жанып, балқимын.

Ақшақардай айналып,

Қыл гүліндей жайқалып,

Самалың боп аңқимын.

Сен үшін тартып тауқымет,

Найзағайдың ұшқынын

Жүрегіме шаншимын.


О, Ана!

Неткен жеңіл есім ең!

Үш әріптен құралып,

Үш жүзді жалғастырып ең.

Мәңгіге мұрағаттаулы

Баға жетпес шежірең.

Тыңдаушы, бір сәт елең ет!

Айтуға жеңіл емес пе?

«Ана» деп тіл қат, керемет!


О, Ана!

Неткен асыл тұлғасың!

Қиын кезде мұңдасым,

Қуанышты сәттерде

Өзіңсің тағы жырласым. 


О, Ана!

Мейірімді жан едің!

Бір қолыңмен бесікті,

Бір қолыңмен әлемді,

Тыныштық бағып тербедің.


О, Ана!

Шабытымды шарпыдың,

Жағаладым жалыныңды.

Қасиетің ба, қадірің ба?

Идірдің алпыс екі тамырымды.


О, Ана!

Тірегім де өзіңсің,

Жүрегімде өзіңсің,

Айтатын әркез сөзімсің.

Өзіңсің ана, өзіңсің,


Аз қызыққа мәз болған,

Көкірегіңе наз толған,

Жатқа кетсем төрімсің.

Іс бастаған оң қолдан,

Бата беріп оң жолдан,


Құлыным дейсің аймалап.

Айналайын, ана жан,

Мадақтауға тұлғаңды,

Жалықпаймын қайталап.


Дұрысымды асырған,

Бұрысымды жасырған,

Мен гүл болсам қырмызы,

Сенсің ана – жайған бақ!

...

О, Ана!

Неткен байтақ едің сен!

Жер анадайсың керілсең.

Иен құшағың бірде тар,

Бірде шексіз, бірде жар,

Қасиетіңнен айналдым! 

Бұрымды шашың толқындай,

Майланған өзен сияқты.

Жанарыңа жас толмай,

Бастаудан бойлап ол ақты,

Кей кезде таңғы шықтардай,

Тұрады мұңмен мөлдіреп,

Кірпігіңе жармасып,

Үзілейін деп үлбіреп. 

...

О, Ана!

Неткен қамқор жан едің!

Білегіңді сыбанып,

Әлденеге қуанып,

Тынып таппай жүресің.

Қабақты да шытасың,

Жібек көйлек кепкенше,

Сондай жайлы мінезің!

...

Анама

Асыл анам, нұр шашқандай келбетің,

Сенсіз басып жүре алам ба жер бетін?

Бір қолыңмен балаң жатқан бесікті,

Бір қолыңмен ұлы әлемді тербеттің.


Ана, жаным, жүре берші қасымда,

Сен өтпеген, бәлкім, осы асу ма?

Әркез маған бата беріп жол нұсқап,

Айтатынсың: «Құлыным-ау, жасыма!».


Сұм тағдырды кешіп өттің басымнан,

Сондықтан да ширақ болдың жасыңнан.

Кешір ана, қателессем кеше көр,

Бірақ алыс кете көрме қасымнан.

...

Асыл әжем, ғасыр әжем аңсаған, 

Сағынышым - сары ормандай самсаған. 

Әке болып жүргенімді ұмытып, 

Әлі күнге еркелеймін мен саған. 


Құлындаймын асыр салған аңғарда, 

Қозыңдаймын ойнақтаған албарда. 

Өзің барда қысылмаймын күлуге, 

Жылауға да қысылмаймын сен барда. 


Мен өзіңнен қабылдаппын сүюді, 

Мен өзіңнен қабылдаппын күюді. 

Сенің жаның жүрегіме ораулы, 

Менің жаным жаулығыңа түюлі. 


Тұра тұршы түзелгенше бұзығың, 

Жүре тұршы жалғанғанда үзігің. 

Маған дәулет неге керек, ақ әже-ау, 

Өзің бірге көре алмасаң қызығын?!

Жапон халқының даналық сөздері
Ана туралы балаларға арналған тақпақтар
Сәйкес тақырыптар
Көтерілу