Үшінші мегаполисте «Туристік Шымкент» квесті сайысы өтті. Ол М. Әуезов атындағы Оңтүстік Қазақстан университетінің студенттік құрама командаларының арасында орын алған онлайн жарыс. 

Сайыс «Рухани жаңғыру және Қазақстан халқы Ассамблеясы» орталығының ұйымдастыруымен «Шымкент: мыңжылдықтар тарихы және қазіргі заман» атты рухани жаңғыру апталық форумы шеңберінде өткізілді. 

Аталған квест мақсаты - жастардың патриоттық сезімін ояту, мәдени-тарихи мұраны зерттеуге тарту, ішкі туризмді дамыту және туған жерге саяхатты насихаттау, экскурсия жүргізуші дағдыларын меңгерген жастарды анықтап, үлге ету.

Бұл сайыстың өзіндік шарттары қойылды. Ойынға қатысушыларға үшінші мегаполистің тарихи-мәдени және архитектуралық мұрасын және қазіргі мүмкіндіктерін зерттеу талабы қойылды. 

Жеңімпаздардан құрылған арнайы топ қаладағы киелі орындар мен тарихи ескерткіштерді аралап, жергілікті тарихшылармен сұхбаттасады. Сондай-ақ, Шымкент қаласы Туризм басқармасы басшысы Олжас Шынтаевтың ұсынысымен «Shymkent tourism center» туристік-ақпараттық орталығының ұйымдастыруымен қаладағы барлық мекеме қызметкерлері мен студент-жастар онлайн диктант жазады деп жоспарлануда.