«WorldSkills Kazakhstan 2021» – VІІ Республикалық кәсіби шеберлік чемпионаты жас кадрларды экономиканың өндірістік секторына тартуға және елдегі техникалық және кәсіптік білімді дамытуға ықпал етеді. Дәл осы сайысқа үшінші мегаполистің намысын қорғап шымкенттік студент Дастан Өмірзақ қатысқан болатын. Ол «ҚР колледждерінің ТОП 100 студенті» республикалық жобасының жеңімпазы атанды. 

Білім және ғылым министрлігі 2020 жылдың қорытындысы бойынша колледж шәкірттерінің арасында республикалық жобаны ұйымдастырған болатын. Жобаның мақсаты – әр өңірдің үздік студенттерін анықтау. 

Аталмыш жобаға қатысу үшін шәкірттер 3 іріктеу кезеңінен өткен. Бірінші колледж ішілік болса, кейіннен аймақтық деңгейде де сыналды. Ал республикалық кезеңге жеткендер онлай дауыс беру арқылы анықталған. 

Дастан қазіргі таңда М.Өтебаев атындағы жоғары жаңа технологиялар колледжінде «Ғимараттар мен құрылымдарды салу және пайдалану» мамандығы бойынша 4 курста білім алуда. Кәсіби біліктіліктерін үнемі жетілдіріп жүрген болашақ маман. Плитка жапсыру, сылақ жұмыстарын іс-тәжірибеде өте сапалы, ұқыпты орындайды. 

Қалалық WorldSkills чемпионатында «Плитка қаптау» құзыреттілігі бойынша жеңімпаз атанған. Болар баланың бетінен қақпа демекші, осы тұста қаладағы экономиканы дамытуда жас өрендердің идеясы мен іскерлігінің пайдасы зор екенін айта кеткен жөн. Колледжішілік дебат, еріктілер клубының белсенді мүшесі. Жауапты, алғыр болашақ маман студенттерді іс-тәжірибеден өткізетін әлеуметтік серіктестер тарапынан да жоғары бағаға ие болды.