Бердібек Сапарбаев: Көпшіліктің карантиннен шаршағанын түсінемін

Oinet.kz 29-05-2020 855

Screenshot_1.jpg

Өңірлік коммуникациялар қызметінде өткен баспасөз мәслихатында Жамбыл облысының әкімі Бердібек Сапарбаев Мемлекет басшысының коронавируспен күрес жөніндегі тапсырмаларын орындау барысы және аймақтағы дағдарысқа қарсы шаралар туралы баяндады. Облыс әкімінің айтуынша, бүгінгі күнге дейін аймақта 358 КВИ ауруы тіркелген, оның ішінде Тараз қаласында 206, Кордай ауданында 46, Байзақта 34, Таласта 12 оқиға тіркелген. Ауырғандардың 173-і сауығып, дәрігерлердің бақылауына алынған.

Облыста 7 зертхана жұмыс істеуде десек, ол арқылы 23 750 адам тексеруден өткен. Ал 2,5 мыңнан астам медицина қызметкеріне 409 миллион теңгеге үстемақы төленген. Сондай-ақ, медициналық мақсаттағы бұйымдармен және дәрі-дәрмектермен қамтамасыз етуге 1,5 миллиард теңге қарастырылған.

Бұдан өзге «Jardem 109» байланыс-орталығының базасында жедел штабтың жұмысы ұйымдастырылып, оған тұрғындардан 24 мыңнан астам қоңырау келіп түскен.

1,5 миллиард теңгенің атаулы әлеуметтік көмегімен 9,5 мың отбасы қамтылды, 300 мыңға жуық адам 42 500 теңге көлеміндегі төлемге қол жеткізіпті. «BizBirgemiz» акциясы аясында және демеушілер тарапынан жалпы 1,1 миллиард теңгеге 72 мың адамға көмек берілді. Барлығы 400 мыңнан астам жамбылдыққа 21 миллиардтан астам теңге көлемінде әлеуметтік төлемдер төленген.

- Президент Қасым-Жомарт Тоқаевтың тапсырмасына сәйкес біздің басты міндетіміз – тұрғындардың денсаулығын сақтау және азаматтардың қауіпсіздігін қамтамасыз ету. Адам өмірінен қымбат ештеңе жоқ. Барлықтарыңыздан қабылданған шараларға түсіністік танытуларыңызды сұраймын. Олар сіз және сіздің жақындарыңыздың амандығы үшін жасалып отыр. Бәрі өзімізге байланысты. Егер тұрғындар санитарлық талаптарды сақтайтын болса, онда карантин режимін жеңілдетуге мүмкіндік туады. Өкінішке орай, бүгінгі таңда мобильді топтардың тексеру нәтижелері көрсеткендей, қоғамдық орындарда азаматтар бетперде кимейді, әлеуметтік қашықтықты сақтамайды. Карантиндік режимді мүмкіндігінше тезірек жою үшін біз өзіміздің әлеуметтік жауапкершілігімізді сезініп, санитарлық талаптарға жауапкершілікпен қарауымыз керек. Мен көпшіліктің карантиннен шаршағанын түсінемін. Бірақ бізге тәуекел етуге болмайды. Тәуекелдің соңы - адам өмірімен есептелуі мүмкін, - деген Бердібек Сапарбаев облыс тұрғындарын жеке қауіпсіздік шараларына жауапкершілікпен қарауға шақырды.

Байдың балаларына грант беруге тыйым салынсын – Ұлттық кеңес мүшесі
«Оу, жоғары жақтағылар...» Еркін Рақышев билікке қатаң талап қойды
Сәйкес тақырыптар
Көтерілу