Премьер-министр Олжас Бектенов Алматы облысының әкімі Марат Сұлтанғазиевті коммуналдық инфрақұрылым жобаларының кешігуіне байланысты сынға алды. 

Алматы облысы жөндеу жұмыстарына түскен өтінімдер саны бойынша "қызыл" аймаққа енген. Премьер-министрдің сұрағына жауап берген облыс әкімі кейбір жобалар қазірдің өзінде іске асырылып жатқанын, ал тағы екі жоба бойынша прокуратураның араласуынан кейін қайта конкурс өткізуге тура келгенін айтты. Сонымен қатар Қаржы министрлігі бұл жобаларды басым емес бағыттар тізіміне енгізіп, қаржыландыруды тоқтатқан.

Баяндамадан кейін Бектенов әкімнің түсіндірмесінен жауапкершілік әкімнің өзінен басқа барлығына жүктеліп тұрғандай әсер қалыптасатынын айтты.

"Сізді тыңдасақ, өзіңізден басқаның бәрі кінәлі. Жеделдетіңіз", – деді премьер-министр.

Ұлттық экономика министрлігінің мәліметінше, Алматы облысынан бөлек, ұлттық жобаларды жүзеге асыру бойынша "қызыл" аймаққа Шымкент қаласы мен Ұлытау облысы да кірген.