Астана қаласының мәслихаты қала маңынан жер беру мен  тұрғын үйлерді салуға тыйым салуды ұсынуда. Елорда мәслихатының  бұл шешімі «Ашық нормативтік құжаттар» порталында 9 наурызға дейін талқылану үшін жарияланған. Ұсынысқа сәйкес 2035 жылға дейін тиісті жоспар, магистральді инженерлік желілер мен әлеуметтік инфрақұрылымы жоқ аумақтардан жер беруге және тұрғын үй салуға уақытша тыйым салынбақ. 

«К-1 айналма жолының солтүстік бөлігінде, Өндіріс тасжолы бойында, К-1 айналма жолының солтүстік-шығыс бөлігінде, Алаш тасжолы бойында, сондай-ақ айналма жолдың шығыс бөлігінде, Астана – Қарағанды тасжолы бойында құрылыс салуға уақытша тыйым енгізу туралы тармақ қосу көзделген», деп жазылыпты мәслихаттың шешімінде.