Қасым-Жомарт Тоқаев Ақ үйде тарихи кездесу ұйымдастырғаны үшін АҚШ Президентіне алғыс айтып, С5+1 форматындағы саммит шын мәнінде Орталық Азия мен Құрама Штаттар арасындағы ынтымақтастықтың жаңа кезеңіне жол ашқанына назар аударды.

Мемлекет басшысы АҚШ Президенті Дональд Трамптың халықаралық саясаттағы рөліне айрықша тоқталып, оны көрнекті мемлекет қайраткері деп бағалады.

– Сіз жүргізіп отырған парасатты және батыл саясатты бүкіл әлем қолдауға лайық деп санаймын. Мен де Сіздің ұстанымдарыңызды қуаттаймын. Сіздің жетекшілігіңізбен Америка алтын дәуірге қадам басты. Біз «Американы қайтадан ұлы елге айналдыру» (Making America Great Again) деп аталатын көреген тұжырымдамаңызды жоғары бағалаймыз. Бұл мақсат «Заң және тәртіп» қағидатына негізделген Әділетті, Қуатты Қазақстан құруды көздейтін ауқымды стратегиямызбен үндеседі. Бітімгер Президент ретінде сегіз айдың ішінде сегіз соғыстың тоқтауына ықпал еттіңіз. Осылайша, Американың халықаралық тұрақтылыққа тірек болған рөлін айтарлықтай күшейте түстіңіз, – деді Қасым-Жомарт Тоқаев.

Қазіргі әлемдегі күрделі геосаяси өзгерістер мемлекеттерден жаңа дипломатиялық бастамаларды, сенімді серіктестікті және өңірлік ынтымақтастықты күшейтуді талап етеді. Осы тұрғыда Қазақстан Президентінің «Орталық Азия – АҚШ» саммитіне қатысуы – елдің сыртқы саясатындағы стратегиялық мәні зор, уақыт талабына сай жасалған қадам. Бұл саммит аймақтың дамуына ықпал ететін жаңа мүмкіндіктер ашып, Қазақстанның халықаралық позициясын нығайтуға арналған маңызды алаңға айналды.

Ең алдымен, саммит Орталық Азия елдерінің өзара ынтымақтастығын жаңа деңгейге көтеруге мүмкіндік береді. Аймақтағы бес мемлекеттің бір үстел басында АҚШ секілді әлемдік державамен тікелей сұхбаттасуы – өңірлік интеграцияны күшейтеді. Бұл форматта қабылданған шешімдер экономикалық байланыстардың дамуына, транзиттік-көліктік дәліздердің кеңеюіне, ортақ қауіпсіздік мәселелерін үйлестіруге оң ықпал етеді. Қазақстан үшін бұл — көпвекторлы саясаттың нақты көрінісі.