Жамбыл облысында шекарадан заңсыз өтпек болған Қазақстан және Тәжікстан азаматтары қамауға алынды, деп хабарлайды Oinet.kz тілшісі Orda.kz-ке сілтеме жасап.

Әлеуметтік желіде «Жамбыл облысында шекарашылар бірнеше мемлекеттік шекара бұзушыға оқ атты» деген ақпарат тарады. Алайда ҰҚК Шекара қызметі оқиғаға қатысты мұндай мәліметтің шындыққа жанаспайтынын хабарлады.

10 қыркүйек түнгі сағат 03:30 шамасында Жамбыл облысы Меркі ауданына қарасты Кеңес ауылы маңында «Меркі» шекара қызметінің әскери қызметкерлері мемлекеттік шекараны заңсыз кесіп өтпек болған үш азаматты ұстады.

Ұсталғандар екеуі Қазақстан азаматы, біреуі Тәжікстан азаматы. Қазақстандықтар денсаулыққа қасақана ауыр зиян келтірді деген күдікпен іздеуде жүрген.

«Әлеуметтік желілерде белгісіз дереккөздерге сілтеме жасай отырып, Жамбыл облысындағы шекарада оқ атылғаны жөнінде ақпарат тарауда. Алайда бұл мәліметтер шындыққа сәйкес келмейді», - деп мәлімдеді ҰҚК Шекара қызметі.

Үшеуі де шекара бұзған сәтте қолға түсіп, тиісті органдарға тапсырылды.