Ақтөбеде 2 айдан астам уақыт бойы мәйітханада жатып қалып, кейін белгісіздер зиратына жерленген Аман Жақаевтің анасы мен қарындасы сотқа жүгінді, деп хабарлайды Oinet.kz тілшісі. 

Олар полиция департаментінен 4 млн теңге моральдық залал талап етті.

Ақтөбедегі сотта марқұм Аман Жақаевтің анасы мен қарындасының арызы бойынша іс қаралды. Талапкер Айтуған Иманғалиевтің айтуынша, былтыр маусым айында баласы Аман Жақаев суға кетіп мерт болған. Ал оның отбасы бұл туралы мүлде білмеген.

- Жазда балам саяжайға кетті. Анда-санда келіп тұратын еді. Бірде жоқ болып кетті. Қызыма полицияға бар деп айттым. Бір күні қызым Жанат жылап келді, ағам қайтып қалды деп. Біз 90 күнге тақағанда біліп, садақа бердік. Оны 6 қыркүйек күні белгісіздер зиратына жерлеген. Баламның зиратын нөмірмен таптық. Балам өзі тұратын, үйленбеген. Жөндеу жұмыстарын жүргізді, аққөңіл еді, - деді Айтуған Иманғалиев.

Отбасының қорғаушысы Ғалымжан Акбаровтың айтуынша, біріншіден, Ішкі істер органдары уақытылы хабар бермеді. Екіншіден, мүрде мәйітханада 2 айдан астам уақыт жатып қалған. Үшіншіден, оны белгісіздер зиратына жерлеген. Осы уәжді алға тартқан отбасы полициядан моральдық шығын талап етті. 

- Талапкерлер өздерінің құқығы жерге тапталғанын айтып отыр. Қайтыс болған күннің өзінде міндетті түрде оны арулап жерлейді ғой. Бұл жерде жетісі, қырқы, жүзін өткізе алмады. Полиция департаментіне қатысты талап арыз беріліп жатыр. Моральдық залал сұралады. Сот құқықтық бағасын береді, - деді қорғаушы.

Сот отырысына қатысқан Ақтөбе облыстық ПД өкілі, екі полиция қызметкерінің кінәсі қызметтік тексеру кезінде анықталғанын, олар лауазымдарынан босатылғанын айтты.

- Учаскелік полиция қызметкерлерінің міндеті – алдын алу. Сеніп тапсырылған мүлікті қорғау, өзіне бекітілген әкімшілік аумақтағы тұрғындардың хәл-жайын біліп отыру. Аман Жақаев 2019 жылдың наурыз айына дейін Алматы облысында тіркелген. 2019-2024 жылдар аралығында еш жерде тіркелмеген. 2024 жылы Жақаевқа қатысты бірнеше әкімшілік материал толтырылған. Оның екеуі қарындасынан түсті. Дегенмен екі қызметкер де қай жерде тұратынын біле тұра хабарламағанын мойындады. Өздеріне қатысты тәртіптік шарамен келісіп отыр. Атқарып отырған қызметінен босатылды екеуі де. Айтуған апайға, Жанатқа моральдық зиян келтіргенін түсінеміз. Жедел уәкіл бастығына «туыстары көме алмайды» деп қол қойдырып алған. Біз азаматтық тұрғыдан бұл кісілерге моральдық зиян келтірмедік деп айта алмаймыз. Алайда ПД ресми ұстанымы бойынша талап арыздағы мән-жайлармен келіспейміз, - деді облыстық ПД өкілі.