Шымкент қаласы кәсіпкерлер үшін қолайлы инфрақұрылым құру бағытында ауқымды жұмыстар жүргізіп жатыр. Қала әкімдігі бизнеске қолжетімді ортаны қамтамасыз ету арқылы шағын және орта кәсіпкерлікті дамытуға ерекше көңіл бөлуде.

Осы бағытта 45 мың шаршы метр аумаққа арналған үш жаңа шағын өндірістік алаңның құрылысын аяқталуға жақын.

Бұл өндіріс алаңдары кәсіпкерлерге толық инфрақұрылыммен қамтамасыз етіліп, олардың жұмысына барлық жағдай жасалған. Алғашқы кезеңде бұл алаңдарда 50-ден астам шағын кәсіпорын ашылады деп жоспарлануда, бұл өз кезегінде 300-ден астам тұрақты жұмыс орнын құруға мүмкіндік береді. Әкім Ғабит Сыздықбековтің айтуынша, бұл жобалар кәсіпкерлердің өндіріс көлемін арттырып, жаңа өнім шығару мүмкіндігін кеңейтетін болады.

Сонымен қатар, кәсіпкерлікті дамыту үшін салықтық жеңілдіктер де қарастырылған. «Өткен жылдан бастап кәсіпкерлерді ашық және адал салық төлеуге ынталандыру мақсатында бөлшек салық мөлшері 4%-дан 2%-ға төмендетілген болатын. Қазіргі кезде осы салық түрінен бюджетке түсетін түсімдер 9 миллиард теңгеден 31 миллиард теңгеге, яғни үш есе өсті. Биыл жаңа Салық кодексіне сәйкес шешім қайта қабылданып, келесі жылдан бастап жеңілдікті пайдаланатын кәсіпкерлердің саны 8 мыңнан 102 мыңға дейін артады» деп атап өтті қала әкімі.

Бұл – шағын және орта бизнеске қолдау көрсетуге бағытталған нақты қадамдардың бірі. Жеңілдіктердің артуы кәсіпкерлерге жаңа жобаларды бастауға, өндіріс көлемін кеңейтуге, жұмыс орындарын көбейтуге мүмкіндік береді. Әкімнің сөзінше, мемлекеттік қолдаудың осындай жүйелі тәсілі кәсіпкерліктің дамуына айтарлықтай серпін беріп отыр.

Шымкент қаласында соңғы үш жылда кәсіпкерлік сектор айтарлықтай өркендеді. Белсенді жұмыс істейтін шағын және орта кәсіпкерлік субъектілерінің саны 128 мыңнан 141 мыңға жетті, ал жұмыспен қамтылғандар саны 250 мыңнан асты. Бұл көрсеткіштер шағын және орта бизнес қала экономикасында алатын үлесінің артуына ықпал етті. Соңғы үш жылда кәсіпкерлікпен өндірілген өнімнің үлесі 41%-дан 58%-ға дейін өсті, бұл экономикалық әртараптандыру мен жергілікті өндірісті дамытудағы маңызды жетістік.

Қала әкімдігі кәсіпкерлікті қолдау бағытында әртүрлі бағдарламаларды іске асыруда. Биылға 20 миллиард теңге қаралып, бұл қаражат арқылы 1 971 жоба мемлекеттік қолдауға ие болды. Көмек алған жобалар арасында ауыл шаруашылығы, жеңіл өнеркәсіп, құрылыс материалдарын шығару және сервис саласындағы кәсіпорындар бар. Мұндай қолдау жаңа бизнесті дамытуды ғана емес, жергілікті өнімнің сапасын арттыруға және экспортқа шығуға мүмкіндік береді.

Шағын өндірістік алаңдар мен салықтық жеңілдіктердің бірлескен тиімділігі кәсіпкерлердің белсенділігін арттыруға, экономикалық өсімді қамтамасыз етуге бағытталған. Әкім Ғабит Сыздықбековтің айтуынша, қаладағы осындай бастамалар кәсіпкерлерге жаңа технологияларды енгізуге, инновациялық өнім шығаруына және тұрақты даму стратегиясын қалыптастыруына көмектеседі.