Шымкент – Қазақстанның ең жылы әрі ерекше қалаларының бірі. Өзінің тарихи мұралары, көркем табиғаты және мәдени ерекшеліктерімен Шымкент туристер үшін тартымды бағытқа айналып келеді. Соңғы жылдары қала әкімдігі туризм саласын дамытуға ерекше назар аударып, аймақтың туристік әлеуетін көтеруге арналған бірқатар жобаларды жүзеге асыруда. Соның бірі -  теміржол вокзалында қала тұрғындары мен қонақтарына арналған жаңа туристік ақпараттық аралшаның  ашылуы.  Бұл бастама Шымкенттің туристік әлеуетін арттыруға және қала туралы сапалы ақпарат ұсынуға бағытталған.

Жаңа ақпараттық аралшада қонақтар Шымкенттің тарихи орындары, мәдени нысандары, демалыс аймақтары, қонақ үйлері мен тамақтану орындары туралы толық мәлімет ала алады. Сондай-ақ туристік бағыттар картасы, қала ішінде жүріп-тұруға арналған көлік маршруттары, экскурсиялық қызметтер мен қалалық іс-шаралар күнтізбесі ұсынылады.

Аралшада тәжірибелі консультанттар жұмыс істейді. Олар қалаға алғаш келген азаматтарға бағыт-бағдар беріп, жолаушылардың сапарын ыңғайлы етуге көмектеседі. Экрандар мен QR-кодтар арқылы туристер қажетті мәліметті онлайн режимде де жедел ала алады.

Шымкент – жыл сайын мыңдаған шетелдік әрі отандық саяхатшыны қабылдайтын ірі туристік орталық. Сондықтан қала әкімдігі мен туризм басқармасы туристерге қолжетімді ақпараттық инфрақұрылымды дамытуға ерекше көңіл бөліп келеді. Теміржол вокзалындағы жаңа аралша – осы жұмыстардың нақты нәтижелерінің бірі.

Мамандардың айтуынша, мұндай орталықтар шетел қонақтарының қаланы оңай бағдарлап, уақытын тиімді өткізуіне септігін тигізеді. Сонымен қатар туристік қызмет көрсетудің сапасын арттырып, өңірдің туристік имиджін күшейтеді.

Соңғы жылдары Шымкент еліміздің жетекші туристік орталықтарының біріне айналып келеді. Қаланың тарихи аймақтары, этноауылдары, көрікті саябақтары мен ұлттық тағамдары шетелдік және отандық туристердің ерекше қызығушылығын тудырып отыр. Жаңа туристік аралша қаланың қонақжай келбетін арттырып, сапалы сервистік қызмет көрсетуді қамтамасыз етпек.

    Ресми деректерге сүйенсек, 2025 жылдың алғашқы жартысында Шымкент қаласына 243 мыңға жуық турист келген. Оның басым бөлігі – ішкі туристер болса, 15,5 мыңнан астамы шетелдік қонақтар. Қаладағы орналастыру орындарының саны 159-ға жетіп, төсек-орын қоры 34%-ға артты. Қызмет көрсету көлемі өткен жылмен салыстырғанда 20%-ға өсіп, 6,3 млрд теңгеден асты.

    Туризмді дамытуға бағытталған ірі инвестициялық жобалар жүзеге асуда. Соңғы бір жылда 7 жаңа қонақ үй ашылып, тағы төртеуі жыл соңына дейін пайдалануға берілмек. Жалпы 14,5 млрд теңге инвестиция тартылып, 240 тұрақты жұмыс орны құрылуда. Бұған қоса, халықаралық деңгейдегі «Hilton» қонақ үйінің құрылысы басталып, 2026 жылы ашылады деп жоспарлануда. Табиғи аймақтарды тиімді пайдалану мақсатында «Omir Shymkent» глэмпинг жобасы қолға алынды.

Туристік инфрақұрылымды жақсарту үшін 17 бағыт бойынша маршруттар қызмет көрсетуде. Сонымен бірге Шымкенттен Сиань, Будапешт, Мюнхен, Шанхай, Каир, Сеул, Үрімші және Баку қалаларына жаңа әуе рейстері ашылды. Қалада туристерге қолайлы жағдай жасау үшін Visit-shymkent.com порталы, QR-кодтар мен 2ГИС жүйесіне енгізілген нысандар қолжетімді.

Жыл сайынғы гастрономиялық, көше тағамдары фестивальдері мен dronе-show секілді имидждік іс-шаралар Шымкентті туристер үшін тартымды ете түсуде. Бұған қоса, этноауылды жаңғырту, гастрономиялық аллея ашу және Бадам су қоймасы аумағын туристік дестинацияға айналдыру жұмыстары жоспарланып отыр.

      Қаланың креативті индустриясы да қарқын алып келеді. 2025 жылы ашылған «Shymkent Creative HUB» орталығы шығармашылық жастардың алаңына айналып, түрлі мастер-класстар мен семинарларға жол ашты. Бүгінде қалада 2 мыңнан астам креативті кәсіпкер тіркелген, ал салаға қолдау көрсету үшін арнайы ассоциация жұмыс істейді.

    Сыртқы байланыстар бағытында да ілгерілеушілік бар. Жыл басынан бері 26 дипломатиялық кездесу өткізіліп, Франция, Қытай, Қырғызстан және Болгариямен жаңа серіктестік жобаларға қол қойылды. Парижде «Шымкент күндері» ұйымдастырылып, Пловдив қаласымен бауырластық байланыс орнатылды. Осылайша, Шымкент туризмді дамыту, халықаралық ынтымақтастықты нығайту және креативті индустрияны өркендету арқылы өзінің мәдени, экономикалық және инвестициялық әлеуетін арттырып келеді.

Шымкенттің туристік болашағы зор. Қаланың стратегиялық орналасуы, тарихи және мәдени мұралары, сондай-ақ табиғи көрікті жерлері оны ішкі және халықаралық туризмнің орталығына айналдыруға мүмкіндік береді. Болашақта Шымкент аймақтық деңгейде ғана емес, халықаралық аренада да беделді туристік орталыққа айналады деп күтілуде.

Шымкент – мәдениет, табиғат және заманауилық үйлесім тапқан ерекше қала. Туристік әлеуетін дамытуға бағытталған жобалар арқылы қала шетелдік және отандық туристер үшін тартымды бағытқа айналуда. Егер сіз тарих пен табиғатты, дәмді тағамдар мен ерекше мәдениетті ұнатсаңыз, Шымкент сіз үшін таптырмас орын болмақ.