Шымкентке Қытайдың «Zhejiang Zhongpu Energy Comprehensive Energy Technology Co., Ltd.» компаниясының өкілдері келіп, қала басшылығымен ауыл шаруашылығына арналған жаңа технологияларды енгізу жөнінде пікір алмасты. 

Энергетикалық және цифрлық шешімдер әзірлеумен танылған бұл компания Шымкентте жоғары технологиялы жылыжай салу жобасын зерттеп жатыр.

Кездесуде қытайлық мамандар компания қызметінің бағыттарын таныстырды. Олар негізінен жаңартылатын энергия көздерін енгізу, энергияны үнемдеу тәсілдерін жетілдіру және көміртек шығарындыларын төмендететін цифрлық басқару жүйелерін дамытумен айналысады. Әсіресе «қос көміртекті бақылау» деп аталатын платформа олардың негізгі технологиялық өнімдерінің бірі болып саналады. Бұл жүйе энергияны қалай пайдаланатынын талдап, қажетті жерде үнемдеу тетіктерін автоматты түрде іске қосады.

Компания өкілдері әкелген жаңа бағыттардың арасында агро-фотовольтаика, балық өсіру мен энергия жүйелерін бір алаңда біріктіру, сондай-ақ жылдам қуатталатын интеллектуалды жарықтандыру желісі бар. Олар ұсынған технологиялардың барлығы бірігіп, энергия шығынын азайтуға және ауыл шаруашылығы өндірісін тиімді жүргізуге мүмкіндік береді.

Кездесудің негізгі тақырыбы  Шымкентте салынып қалуы мүмкін “ақылды жылыжай” болды. Қытайлық тараптың айтуынша, бұл жылыжайлар климаттық жағдайды реттейтін датчиктермен, бұлтты жүйе арқылы жұмыс істейтін бақылау құрылғыларымен және суды үнемдеп қолданатын автоматты суару желісімен жабдықталады. Осындай кешендерде өнім маусымға тәуелсіз өседі және сапасы тұрақты бақылауда болады.

Шымкент жағы да жобаның өңір үшін маңызды екенін атап өтті. Қалада ауыл шаруашылығын жаңғырту бастамасы жүріп жатыр, сондықтан жаңа технологиялар енгізу  агросектордың бәсекеге қабілеттілігін арттырудың бір жолы. Егер жоба жүзеге асса, қалада жаңа жұмыс орындары ашылып, жергілікті шаруашылықтардың тәжірибесіне жаңа стандарт енгізіледі.

Инвесторлар Шымкенттің климаты мен логистикалық мүмкіндіктерін оң бағалап отыр. Компания өкілдері жергілікті нарыққа бейімделген шешім ұсынып, жобаның ұзақ мерзімді болашағы бар екенін жеткізді. Әзірге келіссөздер зерттеу деңгейінде жүр, алайда тараптар жобаның әлеуетін жоғары бағалап отыр.

Кездесу нәтижесі бойынша тараптар ынтымақтастықты жалғастыруға келісті. Қытайлық компания Шымкенттегі агроөнеркәсіптік ахуалды тереңірек зерттеп, нақты техникалық ұсыныстар дайындауға ниетті.

Шымкент қаласы қазіргі таңда шетелдік капитал үшін ашық аймақтардың бірі саналады. Инвесторлармен өткізілген бұл кездесу қаланың инновациялық жобаларды қабылдауға дайын екенін және жаңа серіктестіктерге мүмкіндік беретін орта қалыптасып келе жатқанын көрсетті.