Шымкент қаласында AMANAT партиясының қалалық филиалы, партия жанындағы «Жастар Рухы» жастар қанаты және «ПетроҚазақстан Ойл Продактс» ЖШС ұйымдастыруымен «Жұмысшы жастар» форумы өткізілді.

Іс-шараға жастар қанатының төрағасы Акерке Искандерова, партия филиалының төрағасы Мұрат Жолдыхожаев, зауыт президенті Цзян Жиюань, бірінші вице-президент Бақыт Тасқынұлы, қала әкімдігі өкілдері, жас мамандар, студенттер, депутаттар мен спортшылар қатысты.

Форум басталар алдында қатысушылар зауытқа экскурсия жасап, өндіріс цехтарын аралады. Олар технологиялық үдерістермен танысып, жас мамандарға арналған кәсіби мүмкіндіктерді көрді. Сонымен қатар, кәсіпорын өкілдері бос жұмыс орындарын таныстырып, жастармен ашық пікір алмасу өткізді. Бұл бөлім қатысушыларға өз кәсіби жолын анықтауға, тәжірибе жинауға және өндіріс процесін толық түсінуге мүмкіндік берді. Жас мамандар өздерін қызықтырған сұрақтарын қойып, тәжірибелі қызметкерлерден кеңестер алды.

Пленарлық отырыста «Жастар Рухы» жастар қанатының төрағасы Акерке Искандерова форумның Мемлекет басшысының 2025 жылды «Жұмысшы мамандықтар жылы» деп жариялауына орай өткізілгенін атап өтті. Ол жастардың еңбекқорлығы мен жаңашылдығын біріктіретін алаң құрудың маңыздылығын ерекше атап, мұндай кездесулердің жастарға кәсіби даму мүмкіндіктерін ашып, олардың пікірін тыңдауға жағдай жасайтынын айтты.

AMANAT партиясы қалалық филиалының төрағасы Мұрат Жолдыхожаев өз сөзінде қаладағы жұмысшы жастарды қолдау бағытындағы жобаларға тоқталды. Оның мәліметінше, Шымкентте 331 мыңға жуық жас болса, олардың 8 мыңнан астамы әртүрлі жастар ұйымдарына мүше. Мұрат Жолдыхожаев «Жұмысшы мамандықтар жылы» аясында қолға алынған бастамалардың жастарға жаңа мүмкіндіктер ашатынын және олардың қоғамдық өмірге белсенді араласатынын айтты.

Форумға қатысқан «ПетроҚазақстан Ойл Продактс» ЖШС президенті Цзян Жиюань зауыттағы жаңғырту жұмыстарының жүйелі түрде жүргізіліп жатқанын жеткізді. Ол өндірістің дамуы тікелей білікті мамандарға, әсіресе жаңа технологияларды меңгерген жас кадрларға байланысты екенін атап өтті. «Жас мамандарға инвестиция салу компанияның болашағына салынған инвестиция» деді ол. Осылайша кәсіпорын жастарды кәсіби тұрғыда қолдап, оларға тәжірибе жинауға мүмкіндік беруге ұмтылатынын көрсетті.

Форумға қатысқан қырық жылдан астам еңбек өтілі бар цех бастығы Болат Қалдыкөзов жас мамандарға еңбек сүйгіштік, қызығушылық, ұжыммен жұмыс жасау, қателіктен қорықпау және өмір бойы үйренуден жалықпау сияқты қасиеттерді меңгеру маңызды екенін айтып, өз тәжірибесімен бөлісті. Оның айтуынша, кез келген кәсіпорында жетістікке жету үшін кәсіби білім мен жеке қасиеттердің үйлесімі қажет.

Форум барысында жастар үшін кәсіби тренингтер мен шеберлік сабақтары да ұйымдастырылды. Олар өндірістік процестерді меңгеруге, қауіпсіздік талаптарын сақтауға және өздерін тәжірибеде сынауға мүмкіндік алды. Сонымен қатар, форум қатысушылары бос жұмыс орындары мен стажировка бағдарламалары туралы ақпарат алды. Бұл жастардың кәсіби жолын жоспарлауға және өз қабілеттерін дамытуға көмектесетін маңызды сәт болды.

Шымкентте жастардың кәсіби дамуына арналған осындай жобалар олардың болашақ мансабын қалыптастырып, өңірдің экономикалық дамуына елеулі үлес қосуда.