Қазақ халқының рухани құндылықтарын ұрпақ санасына сіңіру, ұлттық болмысымызды жаңғыртып, ел тарихы мен әдебиетін терең таныту бағытындағы жұмыстар Шымкент қаласында жүйелі жалғасып келеді. 

Осындай игі іс-шаралардың бірі Шымкент қалалық жасөспірімдер кітапханасында өткен қазақ балалар әдебиетінің көрнекті өкілі, ұлттық тәрбие бағытында өлшеусіз еңбек қалдырған қаламгер Сапарғали Бегалиннің туғанына 130 жыл толуына орай ұйымдастырылған «Қанатты қазақ» атты әдеби кеш болды.

Іс-шара барысында жазушының өмірі мен шығармашылық жолынан сыр шертетін бейнематериал көрсетіліп, оның шығармаларындағы ұлттық болмыс, ел тарихы, адамгершілік қасиеттер кеңінен ашылды. Оқушылар «Мен емес, шеге жыртты» әңгімесінен көрініс көрсетіп, ақынның өлеңдерін жатқа оқыды. Ал «Бала Шоқан» шығармасын талқылау арқылы жас буын қазақ ғылымы мен ойшылдығының бастауларын, ұлттық ағартушылық идеялардың қалыптасуын терең түсіне алды.

«Байтерек» мектебінің ұйымдастырушысы Арайлым Ғалымбекқызы С. Бегалиннің балалар тәрбиесіндегі орнын атап өтіп, оның туындылары халқымыздың салт-дәстүрін дәріптеп, жас ұрпақты еңбекқорлыққа, адалдық пен ұлттық санаға баулуда маңызды рөл атқаратынын ерекше атап өтті.

Іс-шараға Д.И. Менделеев атындағы №15 мектеп-лицейі, Қ. Сыпатаев атындағы №7 IT мектеп-лицейі және «Байтерек» мектебінің оқушылары мен ұстаздары қатысып, ән мен күйден шашу шашты. Домбырамен күй тартқан өнерпаздар мен ұлттық мәнері бар қойылымдар жас ұрпақтың ұлттық мәдениетке деген қызығушылығының жоғары екенін көрсетті. Бұл – Шымкент қаласында рухани құндылықтарды жаңғырту бағытында атқарылып жатқан жұмыстардың бір бөлігі ғана. 

Көрме барысында жазушының өмірі, еңбектері, сирек фотосуреттері, қанатты сөздері қойылып, оқушылар ұлттық әдебиеттің тәрбиелік маңызын түсініп, тарихи санасын байытты. Мұндай іс-шаралар жас буынның қазақ халқының бай рухани мұрасын тануына, ұлттық мәдениет пен салт-дәстүрді қадірлеуіне айрықша ықпал етеді.

Кеш соңында өнер көрсеткен оқушылар мен қаламгер еңбегін зерделеуге атсалысқан ұстаздарға алғыс хаттар табысталды. Бұл – ұлттық әдебиет пен рухани құндылықтарды жаңғырту жолындағы еңбектің маңызды бағасы.

Шымкент қаласында өтіп жатқан осындай рухани мазмұнды іс-шаралар ұлттық сана-сезімді қалыптастыруға, ел тарихы мен мәдениетін құрметтеуге, қазақ халқының болмысын терең танытуға бағытталған жүйелі жұмыстың жарқын көрінісі болып табылады.