Әл-Фараби атындағы қалалық ғылыми-әмбебап кітапханасында қазақ руханиятының тамырын тереңнен қозғаған ерекше мәдени-ғылыми шара – «10 құндылық, 8 сипат» концепциясының авторы, филология ғылымдарының кандидаты Асылбек Әуезханұлының «Дала данышпаны Майқы би (қазақылық бастаулары)» атты еңбегінің тұсаукесері өтті. 

Бұл кеш Шымкент қаласында ұлттық дүниетаным мен рухани құндылықтарды жаңғыртуға бағытталған игі бастамалардың біріне айналды.

Шараны кітапхана директоры, ф.ғ.к. Анар Абусайылқызы Жаппарқұлова ашып, қазақ халқының өткенін танып-білу, елдік тарих пен рухани кодты келер ұрпаққа жеткізудің маңызына тоқталды. Шымкент қаласы соңғы жылдары салт-дәстүрді, рухани білімді, этнографиялық мұраны насихаттау бағытында үлкен қадамдар жасап келеді. Бұл тұсаукесер – сол жұмыстардың бірегей жалғасы.

Кешке әдебиеттанушы және тарихшы ғалымдар, педагогтар, зиялы қауым өкілдері, кітапханашылар, студент жастар мен қала тұрғындары қатысты. Олар Майқы би мұрасын тек тарихи тұлға ретінде емес, қазақ болмысының іргелі негіздерін қалыптастырған дана ұстын ретінде қарастырып, оның бүгінгі қоғам үшін өзекті тұстарын талқылады.

Іс-шара барысында автор еңбегінде кеңінен сөз болатын ұлттық дүниетанымның маңызды қырлары жан-жақты ашылды. Мәселен, ел басқару философиясының түп-тамыры болып табылатын «Билік» ілімі, шешендік өнер мен киелі сөз құдіретінің қадір-қасиетін ұғындыратын «Қызыл тіл» концепсиясы, ұлттың сапалық негізін айқындайтын басты қасиеттің бірі «Тектілік» феномені, байырғы түркілік сенім жүйесіндегі үйлесім мен өркениеттік көзқарасты білдіретін «Қазақы ойлау мен сйлеудің бастаулары», салт-дәстүрдің мәні мен тәрбиелік қуаты ұғындыратын «Көшпелілердің рухани адамдық ұстанымдары» сөз болды.

Жоғарыда атап өткен мәселелердің барлығы дерлік қазіргі Қазақстан қоғамында ұлттық құндылықтарды қайта жаңғырту, тарихи сананы қалыптастыру, ел бірлігін күшейту ісінде ерекше рөл атқарады. Шымкент қаласында мәдени-ағартушылық шаралардың жүйелі ұйымдастырылуы – жас ұрпақтың төл мәдениетке қызығушылығын арттырып, ұлттық рухты нығайтуға үлкен үлес қосып келеді.

Кеш барысында көрермендерге сахналық қойылым ұсынылып, дәстүрлі әндер мен жырлар орындалды. Ұлттық өнер арқылы Майқы бидің тұлғалық болмысы мен дала даналығының тынысы айқын сезілді. Шара соңында оқырмандар автордың қолтаңбасы бар кітаптарын алып, естелік суретке түсті.

Бұл тұсаукесер – Шымкент қаласының рухани өміріндегі маңызды оқиғалардың бірі ғана емес, қазақ халқының ғасырлар бойғы даналығын бүгінгі заманмен сабақтастырып, ұлттық болмысты ілгерілетуге бағытталған ортақ іске қосылған қомақты үлес болып бағаланды.