Қажетті бизнес-идеяны таңдау, бизнес-жоспар әзірлеу, салықтарды түсіну, сатуды жолға қою – мұның бәрі кәсіпті енді қолға алған кәсіпкерге қиын шаруа. Кәсіпкерлікке баулитын «Бастау Бизнес» жобасы бизнес бастауға көмектеседі. Аталмыш жоба кәсібін  бастаушы азаматтар үшін бизнес жоспарын іске асыруына жасалып жатқан үлкен мүмкіндік.

Аталмыш жоба негізінде кәсібін бастағандардың бірі тігін шебері - Шынар Сарыбаева. Шымкенттік кәсіпкер қазақи нақыштағы құрақ көрпе-төсек, бесік жабдықтарын жасаумен айналысады. 

 - Өзіме ұнайтын іспен айналысып, қазақтың ұмыт болған ою-өрнектерін заманауи үлгідегі бұйымдар мен киімдерде нақыштап безендіруге тырасамын.  Ең бастысы  жұмысым тапсырыс берушілердің көңілінен шығады – дейді Шынар Пернебекқызы.

Шебер өзінің кәсібін дамыту мақсатында  3 айлық қысқа мерзімді кәсіптік оқыту курсын оқып, куәлік алды. Кейін қайтарымсыз мемлекеттік грантқа құжат өткізген. Нәтижесінде тігін шебері өзінің бизнес жобасын сәтті қорғап, "Еңбек" мемлекеттік бағдарламасы шеңберінде грантқа қол жеткізді. Бүгінде қала тұрғыны өз тігін шеберханасын ашып, тапсырысқа заманауи үлгіде түрлі ою-өрнектелген қыз жасауларын, көрпе-төсек жабдықтарын және т.б. тұрмысқа қажетті заттарды жасауды қолға алған.

Заманауи қоғамда адамдардың киімге, сапаға, ыңғайлылыққа және дара стильге деген қажеттілігі артқан сайын кәсіби тігіншілердің еңбегі жоғары бағалануда. Тігін шеберханасы – тек бұйым тігетін орын ғана емес, шығармашылық шеберханасы, ұлттық мәдениетті сақтап, заманауи сәнмен үйлестіретін кәсіп. Тігін шеберханасын ашу – үлкен жауапкершілік пен еңбекқорлықты талап етеді. Ең алдымен кәсіпкер тұтынушылар талабын зерттеп, қандай бағытта жұмыс істегісі келетінін айқындауы қажет. Мысалы, ұлттық киімдер тігетін шеберхана бір бөлек бағыт болса, заманауи көне үлгіде дизайнерлік көйлектер тігетін, мектеп формасын дайындайтын немесе жөндеу қызметін ұсынатын шеберханалар мүлдем басқа бағытты құрайды. Қай салада жұмыс істесе де, басты талап – сапа мен кәсібилік.

Экономикалық тұрғыдан тігін шеберханасы – жұмыс орындарын құратын, жергілікті нарықты дамытатын пайдалы кәсіп. Тігіншілермен қатар дизайнерлер, материал сатушылар, модельерлер, фотографтар сияқты мамандардың да еңбегіне сұраныс артады. Тігін шеберханасы кәсібі – өнер мен еңбектің ерекше үйлесімі. Бұл салада табысқа жету үшін шеберлікті, талғамды, жаңашылдықты және адаммен жұмыс істей білу қабілетін ұштастыру қажет. Тігін кәсібі уақыт өткен сайын өзінің маңызын жоймай, керісінше қоғамның сұранысына сәйкес дамып келе жатқан маңызды кәсіп саласы.