Шымкент қаласында жастарға кәсіп ашып, өз бизнестерін жүргізуге барынша қолдау көрсетілуде. Қала әкімі Ғабит Сыздықбековтың айтуынша, биыл жастарға арналған 2,5 пайыздық жеңілдетілген несие беру жобасы аясында 300-ден астам азаматтан өтініш түсіпті. Оның ішінде бүгінгі таңға 164 жас оң қорытындысын алған. Олардың 129-ына шағын несие беріліп, басым көпшілігі өз кәсіптерін ашып, жұмыс істеуде. 

- Мемлекет басшысы Қасым-Жомарт Тоқаев «Әділетті Қазақстанның экономикалық бағдары» атты Жолдауларында елімізде шағын және орта кәсіпкерлікті дамытуға ылайықты көңіл бөліп отыр. Бүгінде қала әкімдігі тарапынан кәсіп ашамын дегендерге жан-жақты қолдау бар. Сол қолдаудың арқасында қаламызда кәсіпкерлер саны арта түскен. Мәселен, кезекті комиссия  отырысында жас кәсіпкерлердің бизнес-жоспарлары қаралды. Жиында шағын несие алуға үміткер 40 азаматтың бизнес-жобалары тыңдалды. Нәтижесі бойынша хаттама түзілуде. Жастардың басым көпшілігі ауыр жүк көлік тасымалы, мүйізді ірі қара мал бағу мен сауда-саттық дүкендерін ашу идеяларын ұсынуда, - дейді қала әкімі. 

Оның айтуынша, мемлекеттік қолдау 21 мен 35 жас аралығындағы азаматтарды қамтиды. Жас кәсіпкерлер 5 миллион теңгеге дейінгі несиені мал шаруашылығы жобалары үшін 7 жылға дейін, кәсіптің басқа түрлері үшін 5 жылға дейінгі мерзіммен ала алады. Кепілзат ретінде арнайы техника, жылжымайтын мүлік және жер учаскелері қабылданады. Кепілге қоятын мүлік болмаса кепіл берушіні тартуға болады.

- Жаңа шарттарға сәйкес, кепілді мүлік түрлерінің тізбесі де кеңейтілді. Қосымша екінші деңгейлі банк шоттарындағы қаражаты, республикалық және облыстық маңызы бар қалаларда, аудан орталықтарында, облыстық және аудандық бағыныстағы қалаларда, сондай-ақ ауылдарда және ауылдық елді мекендерде жылжымайтын мүлік, жеке меншік құқығындағы /бастапқы ұзақ мерзімді өтеулі жер пайдалану (жалға алу) (егістік) құқығындағы ауыл шаруашылығы мақсатындағы, жайылымдарды суландыру және қоршау инфрақұрылымы бар және  бау-бақша өсіруге арналған жер телімдері,  мамандандырылған техникалар қабылданады. Туындаған сұрақтар бойынша  https://www.agrocredit.kz сайты арқылы ақпарат алуға болады. Құжаттар «Аграрлық несие корпорациясы» акционерлік қоғамы Шымкент қаласындағы филиалында қабылданады. Ол Қонаев даңғылы, 3/3 мекенжайда орналасқан, - дейді қала әкімі.