Шымкентте бірінші байлық денсаулыққа айрықша көңіл бөлініп келеді. Әсіресе медицина мекемелерінің базасы инновациялық техникалармен толығуда. Ал қызметкерлер заман ағымына сай ақпарттық технологияның тілін  жетік меңгеруде. 

Ендігіде   Шымкентте медбикелердің жұмысы GPS құрылғысымен бақыланатын болды. Әзірге GPS навигациясымен қаладағы №6 емхананың медбикелері жұмыс істеуде. Мұндай тәсілмен мекеме қызметкерлері қаңтар айынан бастап қызмет көрсетуге кіріскен. 

Аталған емханада 60 мыңға жуық тұрғын тіркелген. Дәрігерлер бұл цифрлы жүйе халықтан келіп түсетін өтініш-шағымдардың санын азайтып, бала өлімін болдырмау, медициналық көмекті өз деңгейінде көрсетуге, тіпті, әлеуметтік мәселелердің алдын алуға оң ықпалын тигізеді, – дейді. 

–Қалалық №6 емханада мамыр айынан бастап үздік озық тәжірибелік орталығына көшу бойынша дайындық жұмыстары жүріп жатыр. Осы мақсатта аймақтық медбикелерге Әмбебап прогрессивті патронаж моделін толық енгізуде GPS навигациясы іске қосылды. Бұл мақсатта 38 медбике қажетті құрал-жабдықтармен толық қамтамасыз етілді. Бұл жүйенің басты мақсаты – аймақтық медбикелер аула аралау кезінде 5 жасқа дейінгі балалардың ата-аналарына түсіндіру жұмыстарын жүгізеді, динамикалық бақылауда тұратын азаматтарды жоспарлы профилактикалық тексеруге шақыруды қамтамасыз етеді. 

Егер пациенттер арасында шұғыл медициналық көмек туындаған жағдайда GPS навигациясының батырмасын басу арқылы бас дәрігердің орынбасары, бөлім меңгерушісі және бас медбикенің сымтетіктеріне шақырту келіп түседі. Келіп түскен шақыртуға дер кезінде қажетті медициналық көмек ұсынылады, – дейді Шымкент қалалық №6 емхананың бас дәрігерінің емдеу ісі жөніндегі орынбасары Ұлбала Ерғалиқызы. 

Аталған жүйеге 40-қа жуық медбике атсалысады. Құрылғы арқылы монитордан емхананың аумағында тіркеуде тұрғандардың нақты мекенжайлары көрінеді, пациент туралы ақпараттарды да жүйе арқылы көруге болады. Осылайша GPS навигациясы науқасқа дер кезінде көмек көрсетуге, ал медицина қызметкерлерінің жұмысын жүйелеуге септігін тигізбек. Аталмыш құрылғымен алдағы уақытта қаланың өзге де медицина мекемелері қамтылатын болады.