Шымкент қаласында денсаулық саласына да барынша көңіл бөлініп отыр. Шымкент қалалық №6 емхананың бас дәрігерінің емдеу ісі жөніндегі орынбасары Ұлбала Ерғалиқызының айтуынша, шаһар медицинасында қызмет көрсету сапасын жақсарту және тұрғындар үшін медицинаға қолжетімділікті арттыруда үлкен жобалар іске асуда.

Соның бірі – Шымкент қалалық №6 емхана базасында дәрігерлер халықпен байланысты күшейтудің жаңа моделімен жұмыс істеп жатыр. Атап айтқанда, қаңтар айынан бастап емхана базасында GPS навигациясы іске қосылған. 

Аталған емханада 60 мыңға жуық тұрғын тіркелген. Дәрігерлер бұл цифрлы жүйе халықтан келіп түсетін өтініш-шағымдардың санын азайтып, бала өлімін болдырмау, медициналық көмекті өз деңгейінде көрсетуге, тіпті, әлеуметтік мәселелердің алдын алуға оң ықпалын тигізеді, деп санайды. 

– Мемлекет басшысы Қасым-Жомарт Тоқаевтың «Әділетті Қазақстанның экономикалық бағдары» атты Қазақстан халқына арнаған жаңа Жолдауында медицина саласының дамуы мен адам денсаулығының артуына барынша көңіл бөліп, медицина қызметінің сапасын арттыруды тапсырды. Бүгінде қалалық №6 емханада мамыр айынан бастап үздік озық тәжірибелік орталығына көшу бойынша дайындық жұмыстары жүріп жатыр. Осы мақсатта аймақтық медбикелерге Әмбебап прогрессивті патронаж моделін толық енгізуде GPS навигациясы іске қосылды. Бұл мақсатта 38 медбике қажетті құрал-жабдықтармен толық қамтамасыз етілді. Бұл жүйенің басты мақсаты – аймақтық медбикелер аула аралау кезінде 5 жасқа дейінгі балалардың ата-аналарына түсіндіру жұмыстарын жүгізеді, динамикалық бақылауда тұратын азаматтарды жоспарлы профилактикалық тексеруге шақыруды қамтамасыз етеді. Егер пациенттер арасында шұғыл медициналық көмек туындаған жағдайда GPS навигациясының батырмасын басу арқылы бас дәрігердің орынбасары, бөлім меңгерушісі және бас медбикенің сымтетіктеріне шақырту келіп түседі. Келіп түскен шақыртуға дер кезінде қажетті медициналық көмек ұсынылады, – дейді Шымкент қалалық №6 емхананың бас дәрігерінің емдеу ісі жөніндегі орынбасары Ұлбала Ерғалиқызы. 

Аталған жүйеге қырыққа жуық медбике атсалысады. Құрылғы арқылы монитордан емхананың аумағында тіркеуде тұрғандардың нақты мекенжайлары көрінеді, пациент туралы ақпараттарды да жүйе арқылы көруге болады.