Шымкент қаласында арендалық баспанамен қамтылғандардың саны артып келеді. Бұл бағдарламаның басты мақсаты — жұмыс істейтін жастарға жеке баспана алуға қаражат үнемдеуге мүмкіндік бере отырып, жұмыс істейтін жастарды қолдау.

Осы жоба аясында құжаттарды қабылдау 2019 жылдың желтоқсан айында басталып, Шымшаһарда сатып алу құқығынсыз жастарға  2020 жылы   904 пәтер тапсырылды. Бағдарлама аясында  2021 жылы 300 пәтер,  былтыр 857 пәтер берілген екен. 

Шымкент қаласы бойынша биыл жыл басынан бері арендалық баспанамен қамтылған азаматтар тұрғын үй кезегінен шығарылып, түгендеу жұмыстары жүргізілген болатын. Қала әкімі Мұрат Әйтеновтың айтуынша, түгендеу жұмыстарының барысында көпбалалы отбасылар, ата-анасының қамқорлығынсыз қалған балалар, халықтың әлеуметтік әлсіз тобы және бюджеттік ұйым қызметкерлері санаты арқылы баспанамен қамтылған азаматтар тізімнен алынып, тұрғын үй кезегі айтарлықтай алға жылжыпты.  

Сондай-ақ, Шымкент қаласы әкімдігінің тұрғын үй комиссиясының шешімімен арендалық баспанамен қамтылған азаматтар тізімі басқарманың ресми сайтында  жарияланған. Мемлекеттік тұрғын үй қорынан тұрғын үйге мұқтаж азаматтарды есепке алу және кезекке қою, сонымен қатар жергілікті атқарушы органдардың тұрғын үй беру туралы шешім қабылдау жөніндегі мемлекеттік қызметі республика бойынша kezekte.kz электрондық порталы арқылы іске асады. 

- Аталған электрондық порталдың кезектілік серпіні ашық түрде жүргізіледі. Кез келген қызметті алушы кезекте тұрған, тұрғын үймен қамтылған азаматтар туралы мәліметтерді білуге және өз кезегінің жылжу ретін толық көруге мүмкіндігі бар. Биыл жыл басынан бері түрлі санаттар бойынша кезек реттілігі әр түрлі орналасқан 2700-ден аса азамат кезектен шығарылған. Оның ішінде 168 азамат арендалық бағытта  шілде айында тұрғын үй  комиссиясының шешімі бойынша тұрғын үймен қамтылғандар. Айта кету керек, кезек  реттілігінің тікелей жылжуы  арендалық бағытта баспанамен қамтылған азаматтарды кезектен шығару арқылы жүзеге асырылады, - дейді қала әкімі.