Ордабасы өлкесі мақталы алқап болғандықтан, мұнда мақтамен айналысу тиімді кәсіп түрі. Ауданда ірі мақта цехтары да бар. Мәселен - «Рамазан Агро» мақта зауыты. Ол тек ел аумағына емес, шетелдерге де өз өнімін экспорттайды. Кәсіпорын өткен жылы Чехияға 348 млн. теңгенің мақта талшығын экспорттаған болатын. Бұл көрсеткіш жылдан-жылға артып келеді.

«Рамазан Агро» ЖШС мақта өсіретін шаруа қожалықтары мен өндірістік кооперативтердің техникаларына қызмет көрсетумен айналысады, сонымен қатар оларды сапалы тұқымдармен қамтамасыз етеді.

Зауыттың мақсаты - мақтаны қабылдау, оны қайта өңдеу, мақтадан алынған жүнді тұқымнан бөліп, таза талшық жасау. 

«Рамазан Агро» ЖШС мақта маусымының басынан аяғына дейін фермерлерге көмектеседі: қаржыландырады, жер жыртады, егеді, өңдейді, жәндіктерді өңдейді және егін жинайды. 

Мұнда гектарынан орта есеппен 30 центнерден жоғары сапалы мақта алынады. Зауытта үш бригада жұмыс істейді - әрқайсысы 31 адамнан тұрады. Олар шикі мақтаны қабылдап, өлшеп, сұрыптаумен айналысады, содан дайын өнімді 35 бүлік алаңына таратады, олардың әрқайсысында 400 тоннаға дейін мақта болуы мүмкін.