Шымкент қаласының полицейлері кәмелетке толмағандар арасындағы құқық бұзушылықтардың алдын алу және олардың қауіпсіздігін қамтамасыз ету мақсатында кезекті түнгі профилактикалық рейд өткізді. Іс-шараның негізгі мақсаты – жасөспірімдердің құқықтық қауіпсіздігін күшейту, олардың заңсыз әрекеттерге тартылуына жол бермеу және түнгі уақытта балалардың қауіпсіздігін қамтамасыз ету.

Рейд барысында тәртіп сақшылары ойын-сауық орындарын, компьютерлік клубтарды және жасөспірімдер түнгі мезгілде жиі баратын басқа да орындарды мұқият тексерді. Әсіресе заңды өкілдерінің қарауынсыз жүрген кәмелетке толмағандарды анықтауға ерекше назар аударылды. Сонымен қатар полиция қызметкерлері нысан иелерімен кездесіп, балалардың қауіпсіздігіне қатысты заң талаптарын сақтау жөнінде түсіндіру жұмыстарын жүргізді.

Іс-шара аясында анықталған жасөспірімдермен және олардың ата-аналарымен жеке профилактикалық әңгімелер өткізілді. Тәртіп сақшылары балалардың түнгі уақытта қараусыз жүруінің түрлі құқық бұзушылықтарға, жазатайым оқиғаларға немесе қылмыстың құрбаны болуына себеп болуы мүмкін екенін түсіндірді. Сондай-ақ ата-аналарға балаларының жүріс-тұрысына тұрақты бақылау жасап, олардың бос уақытын тиімді ұйымдастырудың маңыздылығы жөнінде кеңестер берілді.

Бұл бағыттағы жұмыстар Мемлекет басшысы Қасым-Жомарт Тоқаев айқындаған «Заң мен тәртіп» қағидатымен де үндеседі. Аталған бастама қоғамда құқықтық мәдениетті қалыптастыруды, құқық бұзушылықтардың алдын алуды және азаматтардың қауіпсіздігін қамтамасыз етуді көздейді. Әсіресе кәмелетке толмағандардың құқықтарын қорғау мен олардың қауіпсіз ортада тәрбиеленуіне жағдай жасау – осы қағидаттың басым бағыттарының бірі. 

Шымкент қаласының полиция департаменті мұндай түнгі рейдтердің тұрақты түрде жалғасатынын атап өтеді. Өйткені дәл түнгі уақытта балалар мен жасөспірімдердің түрлі құқық бұзушылықтарға немесе келеңсіз жағдайларға тап болу қаупі жоғары болады. «Заң мен тәртіп» қағидатын берік ұстану, ата-аналардың жауапкершілігін арттыру және қоғам болып балалардың қауіпсіздігіне бейжай қарамау ғана өскелең ұрпақтың жарқын болашағын қамтамасыз етеді.