Түркістан облысында тұрғындардың қауіпсіздігін қамтамасыз ету, төтенше жағдайлардың алдын алу және азаматтық қорғау жүйесін жетілдіру бағытындағы жұмыстар «Қауіпсіз ел» тұжырымдамасы аясында кезең-кезеңімен жүзеге асырылып келеді. Осы бағыттағы маңызды жобалардың бірі – ауылдық елді мекендердің қауіпсіздігін арттыруға арналған «Ауыл құтқарушылары» бағдарламасы.

Бағдарлама аясында Кентау қаласына қарасты Қарнақ ауылында жаңадан салынған өрт сөндіру бекетінің салтанатты ашылу рәсімі өтті. Маңызды нысанның пайдалануға берілуі ауыл тұрғындарының қауіпсіздігін қамтамасыз етуге және төтенше жағдайларға жедел әрекет ету мүмкіндігін арттыруға бағытталған нақты қадамдардың бірі болды.

Салтанатты шараға Түркістан облысы әкімінің бірінші орынбасары Зұлпыхар Жолдасов, Түркістан облысы Төтенше жағдайлар департаментінің бастығы Бағдат Чайзада, Кентау қаласының әкімі Жандос Тасов, азаматтық қорғау саласының ардагерлері, қызметкерлері және ауыл тұрғындары қатысты.

Іс-шара барысында сөз алған облыс әкімінің бірінші орынбасары Зұлпыхар Жолдасов өңірде халықтың қауіпсіздігін қамтамасыз ету бағытында ауқымды жұмыстар атқарылып жатқанын атап өтті. Оның айтуынша, Мемлекет басшысының тапсырмасына сәйкес елді мекендердегі қауіпсіздік инфрақұрылымын дамыту, төтенше жағдайлардың алдын алу және азаматтық қорғау жүйесінің материалдық-техникалық әлеуетін арттыру мемлекеттік саясаттың маңызды бағыттарының бірі болып табылады.

– Қауіпсіз қоғам құру тек құқық қорғау органдарының немесе төтенше жағдайлар қызметінің ғана міндеті емес. Бұл – мемлекет пен қоғамның ортақ мақсаты. Сондықтан шалғай ауылдарда осындай нысандардың ашылуы тұрғындардың қауіпсіз өмір сүруіне жағдай жасап, төтенше жағдайлардың салдарын азайтуға мүмкіндік береді, – деді ол.

Бүгінде «Қауіпсіз ел» тұжырымдамасы аясында қоғамдық қауіпсіздікті нығайтуға ерекше көңіл бөлінуде. Бұл бағыт тек құқық бұзушылықтардың алдын алумен шектелмейді. Сонымен қатар табиғи және техногендік сипаттағы төтенше жағдайлардың алдын алу, өрт қауіпсіздігін күшейту, тұрғындарды жедел құтқару және азаматтық қорғау жүйесінің тиімділігін арттыру міндеттерін де қамтиды.

Қарнақ ауылында ашылған жаңа өрт сөндіру бекеті осы міндеттерді жүзеге асыруға мүмкіндік береді. Бұған дейін ауыл тұрғындары үшін өрт немесе өзге де төтенше жағдайлар кезінде арнайы қызметтердің жетуі белгілі бір уақытты талап етсе, енді жедел әрекет ету мүмкіндігі айтарлықтай артады. Бұл өз кезегінде адам өмірін сақтап қалуға, материалдық шығындарды азайтуға және төтенше жағдайлардың ауқымын шектеуге ықпал етеді.

Жаңа нысан заманауи талаптарға сай салынған. Ғимарат арнайы техника мен құрал-жабдықтарды орналастыруға арналған бокстармен қамтамасыз етілген. Қызметкерлердің тәулік бойы жұмыс істеуіне барлық қажетті жағдай жасалған. Сонымен қатар бекет заманауи байланыс және басқару жүйелерімен жабдықталған.

Салтанатты шара аясында өрт сөндіру бекетінің материалдық-техникалық әлеуетін күшейту мақсатында екі арнайы техниканың кілті табысталды. Бұл техника ауыл аумағында орын алуы мүмкін өрттер мен басқа да төтенше жағдайларға жедел әрекет етуге мүмкіндік береді. Заманауи техника құтқарушылардың жұмыс тиімділігін арттырып қана қоймай, тұрғындардың қауіпсіздігін қамтамасыз ету деңгейін де көтереді.

Шара барысында ауыл ақсақалы Ахметжан Эргешов сөз сөйлеп, тұрғындар атынан ризашылығын білдірді. Ол жаңа нысанның ауыл халқы үшін маңызы зор екенін айтып, ел тыныштығы мен халық қауіпсіздігі жолында қызмет ететін құтқарушыларға ақ батасын берді.

Іс-шарада азаматтық қорғау саласының дамуына үлес қосқан қызметкерлер мен сала ардагерлері марапатталды. Бұл олардың ел қауіпсіздігін қамтамасыз ету жолындағы еңбегіне көрсетілген құрметтің белгісі болды.

Айта кетейік, «Ауыл құтқарушылары» бағдарламасы ауылдық аумақтардағы қауіпсіздік деңгейін арттыруға бағытталған маңызды жобалардың бірі саналады. Бағдарлама аясында өрт сөндіру бекеттерінің желісін кеңейту, құтқару бөлімшелерін қажетті техникамен қамтамасыз ету, материалдық-техникалық базаны нығайту және азаматтық қорғау жүйесінің тиімділігін арттыру жұмыстары кезең-кезеңімен жалғасуда.

Қауіпсіздік – мемлекеттің тұрақты дамуының және халықтың әл-ауқатының басты кепілі. Сондықтан Түркістан облысында «Қауіпсіз ел» тұжырымдамасы аясында қолға алынған мұндай жобалар тұрғындардың өмірі мен денсаулығын қорғауға, төтенше жағдайлардың алдын алуға және қауіпсіз орта қалыптастыруға қызмет ете береді.