Түркістан облысында қоғамдық қауіпсіздікті қамтамасыз ету, құқық бұзушылықтардың алдын алу және жол қозғалысы мәдениетін қалыптастыру бағытындағы жұмыстар «Заң мен тәртіп» қағидаты мен «Қауіпсіз ел» тұжырымдамасы аясында жүйелі түрде жүзеге асырылуда. Бұл бағытта заманауи цифрлық технологияларды пайдалану құқық қорғау органдары жұмысының тиімділігін арттырып, қоғамдық тәртіпті нығайтуға оң ықпал етуде.

Облыс аумағында полиция қызметкерлері қоғамдық тәртіпті сақтау, азаматтардың қауіпсіздігін қамтамасыз ету және жол-көлік оқиғаларының алдын алу мақсатында профилактикалық жұмыстарды тұрақты жүргізіп келеді. Осы міндеттерді орындауда бейнебақылау жүйелерінің рөлі ерекше. Әсіресе Түлкібас ауданында орнатылған Жедел басқару орталығының заманауи техникалық мүмкіндіктері құқық бұзушылықтарды жедел анықтап, олардың жолын кесуге мүмкіндік беруде.

Бүгінде аудан аумағындағы бейнебақылау камералары тәулік бойы үздіксіз жұмыс істейді. Бақылау жүйелері көшелердегі, қоғамдық орындардағы және жол бойындағы жағдайды қадағалап, құқық бұзушылықтар туралы ақпаратты жедел түрде полиция қызметкерлеріне жеткізеді. Бұл өз кезегінде құқық қорғау органдарының әрекет ету уақытын қысқартып, қоғамдық қауіпсіздік деңгейін арттыруға ықпал етуде.

Мәселен, кезекті бақылау барысында Жедел басқару орталығының қызметкерлері «Volkswagen Passat» маркалы автокөлік жүргізушісінің көлік құралын жол қозғалысы ережелерінде белгіленбеген орынға қойғанын анықтады. Аталған дерек бойынша полиция қызметкерлері жедел шара қолданып, жүргізушіге қатысты Қазақстан Республикасының Әкімшілік құқық бұзушылық туралы кодексіне сәйкес тиісті әкімшілік хаттама толтырды.

Мұндай құқық бұзушылықтар алғаш қарағанда елеусіз болып көрінгенімен, жол қозғалысының қалыпты ұйымдастырылуына кедергі келтіріп, төтенше жағдайлардың туындауына себеп болуы мүмкін. Сондықтан тәртіп сақшылары жол қозғалысына қатысушыларды көлік құралдарын тоқтату және тұраққа қою ережелерін қатаң сақтауға шақырады.

Жалпы жыл басынан бері Түлкібас ауданындағы бейнебақылау камераларының көмегімен 2000-нан астам әкімшілік құқық бұзушылық анықталған. Бұл көрсеткіш цифрлық бақылау жүйелерінің қоғамдық қауіпсіздікті қамтамасыз етудегі тиімділігін көрсетеді. Сонымен қатар бейнекамералар құқық бұзушылықтарды тіркеп қана қоймай, олардың алдын алуға да ықпал етеді. Себебі қоғамдық орындардың бақылауда екенін білетін азаматтар заң талаптарын сақтауға жауапкершілікпен қарайды.

Қазіргі таңда өңірде «Қауіпсіз ел» жобасы аясында қоғамдық орындарды бейнебақылау жүйелерімен қамту, жол қауіпсіздігін арттыру және құқық бұзушылықтардың алдын алу бағытындағы жұмыстар кезең-кезеңімен жалғасып келеді. Бұл бастамалар тұрғындардың қауіпсіз өмір сүруіне қолайлы жағдай жасап, өңірдегі криминогендік ахуалды тұрақтандыруға мүмкіндік беруде.

Тәртіп сақшылары тұрғындарды қоғамдық орындарда тәртіп сақтауға, жол қозғалысы ережелерін қатаң ұстануға және заң талаптарын орындауға шақырады. Өйткені жолдағы және қоғамдық ортадағы қауіпсіздік тек полиция қызметкерлерінің ғана емес, әрбір азаматтың жауапкершілігі болып табылады. Заңға құрмет пен қоғамдық тәртіпке деген жауапкершілік – қауіпсіз қоғам қалыптастырудың басты кепілі.