Мақтаарал ауданындағы №49 Ж. Нұрлыбаев атындағы жалпы білім беретін мектепте оқушылар арасында зиянды әдеттердің алдын алу және салауатты өмір салтын насихаттау мақсатында кең көлемді түсіндіру жұмыстары өткізілді. Іс-шара барысында нашақорлық, темекі шегу және алкогольдік ішімдіктердің адам ағзасына тигізетін зияны жан-жақты түсіндірілді.

Кездесу барысында мамандар темекі шегудің өкпе, жүрек-қан тамыр жүйесіне тікелей кері әсер ететінін атап өтті. Темекідегі никотин адамның жүйке жүйесін әлсіретіп, тәуелділікке тез алып келетін қауіпті зат екені түсіндірілді. Сонымен қатар, ұзақ уақыт темекі шегу тыныс алу жолдарының созылмалы ауруларына, өкпе обырына және жалпы иммунитеттің төмендеуіне себеп болатыны айтылды.

Алкогольдік ішімдіктердің зияны да кеңінен түсіндірілді. Мамандар алкоголь адамның ми қызметін бұзып, есте сақтау қабілетін төмендететінін, бауыр мен асқазан-ішек жүйесіне ауыр зақым келтіретінін атап өтті. Сондай-ақ алкогольдік тәуелділік адамның мінез-құлқын өзгертіп, отбасылық және әлеуметтік қарым-қатынастарға кері әсер ететіні туралы нақты мысалдар келтірілді. Жасөспірімдер ағзасы әлі толық қалыптаспағандықтан, алкоголь мен темекінің әсері олар үшін әлдеқайда қауіпті екені ерекше ескертілді.

Сондай-ақ нашақорлықтың салдары туралы да ақпарат беріліп, оның адам өмірін қысқартатын, психологиялық және физикалық тәуелділікке әкелетін аса қауіпті құбылыс екені түсіндірілді. Мұндай зиянды әдеттердің қоғамға да, жеке тұлғаға да орны толмас зиян келтіретіні айтылды.

Іс-шара барысында оқушылар өздерін қызықтырған сұрақтарын қойып, мамандардан нақты әрі өмірлік мысалдарға негізделген жауаптар алды. Жастарға бос уақытты спортпен айналысуға, шығармашылықпен шұғылдануға және пайдалы істерге арнау қажеттігі жөнінде кеңестер берілді.

Мұндай профилактикалық шаралардың негізгі мақсаты – жасөспірімдер арасында зиянды әдеттердің алдын алу, олардың саналы таңдау жасауына ықпал ету және денсаулықтың адам өміріндегі ең үлкен құндылық екенін түсіндіру.

Жалпы, денсаулық – ең басты байлық. Сондықтан әрбір жас темекі, алкоголь және өзге де зиянды әдеттерден аулақ болып, салауатты өмір салтын берік ұстануы қажет.