Қазақстан Республикасы Мемлекеттік қызмет істері агенттігінің Түркістан облысы бойынша департаменті ұйымдастырған маңызды кездесу өтті. Жиынға департамент басшысының орынбасары Н. Амандық қатысып, мемлекеттік қызмет жүйесіндегі өзекті мәселелер мен сыбайлас жемқорлықтың алдын алу бағытындағы негізгі міндеттерге тоқталды.

Іс-шараға облыстық басқармалар, аудан және қала әкімдері аппараттарының қызметкерлері, кадр қызметтерінің мамандары, сондай-ақ квазимемлекеттік сектор өкілдері қатысты. Кең ауқымды аудиторияны қамтыған жиын мемлекеттік басқару жүйесіндегі ашықтық пен есептілікті арттыруға бағытталды.

Кездесу барысында қатысушыларға сыбайлас жемқорлықтың алдын алу шаралары жан-жақты түсіндірілді. Атап айтқанда, сыбайлас жемқорлыққа қарсы саясаттың негізгі бағыттары, тәуекелдердің алдын алу тетіктері және осы саладағы заңнамалық талаптар кеңінен сөз болды. Сонымен қатар, сыбайлас жемқорлыққа қарсы тұжырымдама аясындағы жаңашыл бастамалар таныстырылып, олардың мемлекеттік органдар қызметіндегі тиімділігіне назар аударылды.

Жиында комплаенс-офицерлердің рөлі ерекше атап өтілді. Олардың ұйымдардағы ішкі бақылау жүйесін жетілдірудегі, заң бұзушылықтардың алдын алудағы және адалдық қағидаттарын орнықтырудағы маңызы жан-жақты түсіндірілді. Қатысушыларға комплаенс қызметінің тиімді жұмыс істеуі ұйым беделін арттырып қана қоймай, құқықтық тәуекелдерді азайтуға мүмкіндік беретіні айтылды.

Сондай-ақ, мемлекеттік қызметке іріктеудің жаңа тәртібі туралы ақпарат беріліп, оның ашықтықты қамтамасыз етуге, меритократия қағидаттарын нығайтуға бағытталған артықшылықтары түсіндірілді. Бұдан бөлек, мемлекеттік қызметшілердің Әдеп кодексінің нормаларын сақтау, қызметтік тәртіпті күшейту және қоғаммен өзара қарым-қатынаста жоғары мәдениет таныту мәселелері қозғалды.

Кездесу барысында қатысушылар өздерін толғандырған сұрақтарын қойып, нақты жауаптар алды. Ашық пікір алмасу форматында өткен жиын тәжірибе бөлісуге және кәсіби біліктілікті арттыруға мүмкіндік берді.

Іс-шара қорытындысында сыбайлас жемқорлықтың алдын алу – әрбір мемлекеттік қызметшінің ғана емес, бүкіл қоғамның ортақ міндеті екені ерекше атап өтілді. Осы бағыттағы жұмыстарды жүйелі түрде жалғастыру, алдын алу шараларын күшейту және заң талаптарын қатаң сақтау қажеттігі айтылды.