Түркістан облысында салауатты өмір салтын насихаттауға бағытталған бастамалар қарқын алып, ішімдіктен толық бас тартқан ауылдар қатары тағы да толықты. Соңғы мәліметтерге сәйкес, өңірде алкоголь өнімдерін сатудан және тұтынудан ерікті түрде бас тартқан елді мекендер саны 70-ке жетті. Бұл – қоғамдағы саналы өзгерістердің айқын көрінісі әрі тұрғындардың денсаулық пен қауіпсіз өмірді басты орынға қоя бастағанының дәлелі.

Жуырда бұл игі бастамаға Төле би ауданына қарасты Зағамбар, Алғабас және Тағайна ауылдары қосылды. Аталған үш ауылдың тұрғындары ортақ келісімге келіп, ішімдіксіз өмір салтын таңдаған. Бұл шешім ауыл халқының бірлігі мен жауапкершілігін көрсетіп қана қоймай, болашақ ұрпақ үшін дұрыс бағыт қалыптастыруға жасалған маңызды қадам болып отыр.

Зағамбар ауылының тұрғыны Сүттібай Егізбайдың айтуынша, бұл бастама бүкіл ауыл тұрғындарының ортақ шешімімен жүзеге асқан. Оның сөзінше, ауылда 6 мыңнан астам адам тұрады және мұнда қазақ пен өзбек ұлттарының өкілдері тату-тәтті өмір сүріп келеді. Сол сияқты Тағайна ауылында негізінен өзбек халқы, ал Алғабас ауылында қазақ халқы басым. Әртүрлі этнос өкілдерінің бір мақсат жолында бірігіп, ішімдіктен бас тартуы – қоғамдағы келісім мен өзара түсіністіктің жоғары деңгейін аңғартады.

Ал Тағайна ауылының тұрғыны Хушнид Мадалиев бұл бастаманы жастар атынан толық қолдайтынын жеткізді. Оның айтуынша, ішімдіксіз өмір салты – жастардың болашағы үшін маңызды таңдау. Бұл шешім олардың білімге, спортқа және жеке дамуға көбірек көңіл бөлуіне мүмкіндік береді.

Жалпы, «Ішімдіксіз ауыл» жобасы елімізде Ішкі істер министрлігінің бастамасымен қолға алынған. Түркістан облыстық полиция департаментінің мәліметінше, мұндай ауылдарда қылмыс деңгейі айтарлықтай төмендеп, кейбірінде мүлдем тіркелмеген. Бұл – бастаманың тиімділігін дәлелдейтін негізгі көрсеткіштердің бірі.

Мамандардың пікірінше, ішімдіктен бас тарту тек құқықбұзушылықтың азаюына ғана емес, сонымен қатар қоғамдық тәртіптің нығаюына, отбасы құндылықтарының сақталуына және тұрғындардың өмір сапасының жақсаруына ықпал етеді. Ішімдіксіз ортада өскен жастардың да болашағы жарқын болатыны анық.

Айта кетейік, бұған дейін Түркістан облысында Дермене, Табысты, Жаңажол, Нұртас және Мәдениет ауылдары да осы бастамаға қосылып, ішімдіксіз ауылдар қатарына енген болатын. Бұл ауылдарда да оң өзгерістер байқалып, тұрғындардың тұрмыс деңгейі мен қоғамдық белсенділігі артқаны айтылуда.

   Түркістан облысындағы «Ішімдіксіз ауыл» жобасы – қоғамдағы маңызды әлеуметтік өзгерістердің бастауы. Бұл бастама тұрғындардың денсаулығын жақсартып қана қоймай, өңірдегі қоғамдық тұрақтылық пен қауіпсіздікті қамтамасыз етуге де зор үлес қосып отыр. Мұндай тәжірибе алдағы уақытта еліміздің өзге өңірлерінде де кеңінен қолдау табуы әбден мүмкін.

Жалпы  Түркістан облысында мектептерде, мешіттер мен мәдениет үйлерінде «Салауатты өмір – жарқын болашақ кепілі» атты кездесулер өткізіліп, жастарға алкогольдің зияны жан-жақты түсіндірілуде. Бүгінде ауыл тұрғындары той-мерекелерді де ішімдіксіз өткізуді дәстүрге айналдырып, қоғамға үлгі боларлық орта қалыптастырған.

Алкогольге тәуелділік тек бір адамның жеке мәселесі емес, бүкіл қоғамға қатысты. Қоғамдық денсаулықты сақтау үшін әрбір азамат өзінің денсаулығына жауапты болуы қажет. Алкогольді тұтынуды азайту және зиянды әдеттерден бас тарту арқылы ғана біз халықтың денсаулығын жақсарта аламыз. Қоғамдық ұйымдар мен денсаулық сақтау мекемелері халыққа арналған ақпараттық кампанияларды кеңейтіп, алкогольдің зияны туралы ашық айтып отыруы қажет. Жастар арасында сауатты және дені сау ұрпақты тәрбиелеу – елдің болашағына жасаған ең маңызды қадамдардың бірі.