Жердегі періштелер сирек болғанымен әлемнің әр түкпірінде кездеседі. Тіпті Қазақстанда да. 1990 жылы Алматыда дүниеге келген Алена Субботина кезінде волейболмен айналысқан. 17 жасынан бастап сән саласында қызмет етіп келеді. Бойжеткеннің қарым-қабілетін ашып, сән сахнасына сүйрелеген отандық дизайнер – Құралай Нұрқаділова. Ақша жүзді сәнбике 2011 жылы халықаралық дәрежеде өткен сән көрсетілімінде Givenchy-дің өнімдерін елге көрсетті. «Kazakhgirl» деген лақап аты бар. Алена бүгінде Америка мен Еуропаға танылып, көптеген шыңдарды бағындырып үлгерді.

Орал қаласында да Дильназ есімді кішкентай альбинос қыз өсіп келеді. Үш жастағы отбасының тұңғышы өте бауырмал, сезімтал, көпшіл. Өнерге жақын екен. Қыз бала ерекше кейіпте дүниеге келгенде ата-анасы, туыстары тегіс таңқалған.

– Терісі, шашы мен кірпігі аппақ, көзі көк, кейде жасыл, сары, ақ түске дейін күніне бірнеше рет өзгеретін сәбиіміз үшін қатты алаңдадық. Оның денсаулығын тексертіп, дәрігер аль­би­низм­нің тек көру қабілеті мен терісінің өзгеруіне ғана әсер еткенін айтқанда уайымымыз едәуір сейілді. Көшеге серуендеуге шықсақ немесе қонаққа барғанда, оған тосырқай қарайтындар өте көп. Көбісі қуыршаққа ұқсатады. Альбинос деп білетіндер түсіністік танытып қызымызға жақсы тілектер де айтып жатады, – дейді анасы Тамара.

Кадимовтар әулетінде жақында екінші қыз өмірге келген. Сәби әпкесіне тартпапты. Кім білсін, болашақта Дильназ да бір жерді тесіп шығар. Дәрігерлер Орал қаласында, жалпы Батыс Қазақстан облысында мұндай 100 пайыздық альбинизм бұрын-соңды кездеспегенін айтады.

Бір қуантарлығы, альбиностар біздің елде таңсық жандар болғанымен оларға психологиялық қысым, зорлық-зомбылық көрсету жағдайлары кездеспейді. Жалпы, «қазақ ұлтында альбинизмнің өте сирек кездесуі жеті атадан қыз алыспау дәстүрінің берік сақталғанынан, қан тазалығынан» дейді медицина саласын зерттеушілер.